Ebakuntza egiteko behar duen dirua lortu du Eider Garciak
Oreka eta mugikortasuna zailtzen dizkion biparesia espastikoa du errenteriarrak. Ebakuntza egiteko laguntza eskatu zuten haren gurasoek eta 24 orduan jaso dute behar duten dirua.
Mario Garcia, Arantxa Elosegi eta Eider Garcia Elosegi. Jaio eta 13 egunera ebakuntza egin behar izan zioten Eider Garcia Elosegiri kardiopatia bat sendatzeko. Oxigenoa emateko garaian izandako arazo batek, baina, garun paralisia eragin zion bi hankengan ondorioak izan zituena. Oreka eta mugikortasuna zailtzen dizkion biparesia espastikoa diagnostikatu zioten errenteriarrari.
Sei hilabete eman zituen Gurutzetako ospitalean hil ala biziko egoeran. Diafragman ebakuntza egin eta ibiltzeko lagungarri zituen aparatuak kentzeko aukera izan zuen. Egun, terapiei esker, hezten jarraitu daiteke Eider, eta zailtasunekin bada ere, autonomoki bizitzeko gai da.
Bidean, baina, argi bat piztu zaio gaztetxo errenteriarrari, ebakuntza batek bere bizi kalitatea hobetu dezakeelako: “Bartzelonako klinika batek, fascian, giharrak estaltzen dituen ehunean, ebakuntza egin diezaioke Eiderri; fasziak zailtzen du gure alabaren mugikortasuna. Ebakuntzaren bidez, fascian hainbat ebaki egingo dizkiote giharra askatu ahal izateko”, azaldu dute Arantxa Elosegi eta Mario Garcia gurasoek. Ebakuntzari esker, ibilera hobetuko du, korrika egiteko modua, baita eskailerak igotzeko era ere gurasoek azaldu dutenez, “mugikortasuna hobetuko du”.
Maiatzaren 4an egingo diote ebakuntza Eiderri. Eta ebakuntza egiteak 9.000 euro balio du, “orain egin behar dugu ebakuntza, 11 urte ditu Eiderrek eta adin horretan egitea gomendatzen dute hanketako hezurduretan atrofiarik izan aurretik”. Ondoren errehabilitazio gogorra egin beharko du gaztetxoak, berriro oinez ikasteko, eta horri ere aurre egin beharko dio familiak ekonomikoki.
Hala, Eiderren gurasoek laguntza ekonomikoa eskatu diete herritarrei, ebakuntza, ebakuntza ostekoari eta errehabilitazioari aurre egin ahal izateko. Gurasoen deialdiari azkar erantzun diote herrikideek, eta 24 orduan jaso du Garcia Elosegi familiak ebakuntza egiteko behar duen diru hori herritarren ekarpenei esker.
Errenteria-Oreretako Juneren Hegoak elkarteko familietako bat da Eider Garcia Elosegirena. Elkartearen egitekoa, haurren gaixotasun edota doluagatik egoera zaurgarrian dauden Gipuzkoako familiei laguntza eskaintzea da, horretarako babes sare bat sortuta.
