Goi mailako ganbera musikan, Pasaia erreferentzia
Ganbera Musikaren IX. Astea egingo dute hilaren 19tik 22ra. Lau kontzertu jasoko ditu Trintxerpeko alkateordetzak, Musikeneko ikasleenak.
Pasaiako Ganbera IX. Musika Astea egingo dute hilaren 19tik 22ra. Horren barruan, goi mailako lau kontzertu jasoko ditu Trintxerpeko alkateordetzak. Izan ere, Pasaia jada ganbera musikan herrialde mailako erreferente bihurtzen ari da, ez baita nolanahikoa musika ziklo batek ia hamar urte betetzea. Pasaia Musikalek (hasieran Illunbe) 49 urteko bizitza du jada, mende erdira hurbiltzen ari da. Hala, musika eta hezkuntza batzen dituen egitasmoak are indar handiagoarekin darrai lanean, tartean, ganbera musika zikloa dagoelarik.
Pasaiako Udalaren, Pasaia Musikalen, Musikeneren eta Trintxerpe-Illunberen arteko sinergiatik sortu da aurten ere ganbera zikloa. Etxekoek behar den antolaketa eremu osoa hartu dute beregain; Musikenekoak izango dira instrumentuak jotzeaz arduratuko direnak. Gaur aurkeztu dute zikloa, Pasaia Musikalen egoitzan antolatzaileenk nahiz partaideen ordezkariek.
Honakoa da egitaraua (kontzertu guztiak 19:30ean dira):
- Apirilak 19, astelehena. Argenta laukotearen kontzertua.
- Apirilak 20, asteartea. KAE hirukotearen saioa.
- Apirilak 21, asteazkena. Sinergia laukotea izango da Trintxerpeko alkateordetzan.
- Apirilak 22, osteguna Lucky Luciano Quartet taldearen txanda.
- Egitarauaren zehaztasunak eta taldeen ezaugarriak ikusteko sakatu hemen (PDF artxiboa jaitsiko da).
Doan, baina gonbidapena behar da
Osasun segurtasun neurriengatik, aforo muga izango du Trintxerpeko alkateordetzak kontzertuetarako. Horregatik, bertarako sarbidea gonbidapen bidez soilik izango da.
Horiek lortzeko Pasaia Musikalen telefono zenbakira deitu behar da (943 39 60 55) astelehenetik ostegunera 09:00etatik 13:00etara goizez eta 16:00etatik 19:00etara arratsaldez. Bestela, Internet bidez ere lor daitezke gonbidapen horiek.
