San Markorako Igoera lasterketa, hilaren 25ean
COVID protokolo berezia prestatu dute lasterketa eraldatuta bada ere egin ahal izateko, eta udalaren oniritzia jaso dutela aurrera egiteko jakinarazi dute antolatzaileek.
San Markora Igoera lasterketako artxibo irudi bat. Argazkia: Carrera Errenteriako Atletismo Taldeak jakinarazi duenez, San Markorako Igoera Mendi Lasterketa egingo du aurten. COVID protokolo berezia prestatu dute lasterketa eraldatuta bada ere egin ahal izateko, eta udalaren oniritzia jaso dutela aurrera egiteko jakinarazi dute antolatzaileek.
Hilaren 25ean, igandearekin egingo dute mendi lasterketaren zortzigarren ekitaldia. Ibilbide berria diseinatu dute antolatzaileek, orain arte 11,6 kilometrokoa bazen, aurten 13,151 kilometrokoa izango da, eta irteera eta helmuga egokitu egin dituzte, eta lasterkariek 493 metroko desnibel metatuari aurre egin beharko diote.
Irteera ordua lasterkari bakoitzari jakinaraziko diote antolatzaileek posta elektroniko bidez lasterketa aurreko ostegunean, baina aurreratu dutenez, 09:00ak eta 11:00ak artean izango da.
Korrikalari muga ere ezarri dute: 200 dortsal.
Lasterketan parte hartzeko 17 euro ordaindu beharko dira Kutxako ES73 2095 5064 801061039144 kontu korronte zenbakian.
Sariei dagokionean, helmugaratzen diren lehen hiru emakumeek eta lehen hiru gizonek jasoko dituzte. Opari moduan berriz, buff pertsonalizatua, bidoia, musukoa eta 2020ko San Silbestre lasterketako kamiseta jasoko dute parte hartzaileek. Izena eman nahi dutenek, esteka honen bidez egin dezakete.
