Baheketa zenbakitan: bost egun, 7.000 PCR, eta 50 positibo
Beste datu bat ere eman du udalak. Baheketan parte hartu duten ostalaritza establezimenduetako langileen artean ez da positiborik hauteman; bai ordea, dispositibotik kanpo zeuden beste bi tabernatan
Baheketaren irudi bat larunbatean. Azkar joan ziren probak azken egunean, ostegun eta ostiralaren antzera. Larunbatean amaitu zuten Osakidetzak eta Osasun Sailak antolatutako baheketa masiboa. Ia hiru asteko epean, Zumardian, Diputazio Plazan eta inguruko tabernetan egondako herritarrak deitu zituzten PCR probak egitera. Erantzuna ezin hobea izan zen hasieratik herritarren partetik; arduraz erantzun zioten deiari eta lehen egunean bertan 4.000 hitzordutik gora lotu zituzten osasun langileek.
Orain, baheketa amaituta, datu zehatzak eman ditu berriro udalak. Ondokoak dira baheketa masibo horrek utzitakoak: bost egunean, 7.000 lagunetik gora pasa dira Merkatuzarretik PCR proba egitera, eta horietan, 50 positibo hauteman dituzte. Egindako proba kopurua kontuan hartuta, %0,71 izan da positiboa. Beste datu bat ere eman du udalak. Baheketan parte hartu duten ostalaritza establezimenduetako langileen artean ez da positiborik hauteman; bai ordea, dispositibotik kanpo zeuden beste bi tabernatan.
Baheketa beraren berri emateaz gain, erakundeei gardentasunez emaitzen berri eta ateratako ondorioak jakinaraztea zegokiola esan zuen Aizpea Otaegi alkateak joan den asteartean, baheketaren lehen egunean. Hurrengo egunean jakinarazi zituen asteartean egindako proba kopurua eta jasotako emaitzak udalak. Orain, baheketa amaituta, datu zehatzak eman ditu berriro udalak.
Ostarik baheketa masiboan parte hartzera deitu zituen herritarrak, “arduraz jokatzeko” eskatuta, eta salatu egin zuen, aldi berean, berriz ere ostalaritza kriminalizatzen ari zirela. Baheketa masibo hori tabernen bueltan soilik deitu zutela salatu zuen ostalarien elkarteak, nahiz eta ez zen lotu establezimendu horietan azaldutako inongo positiborekin.
Udalak azkenik, eskerrak eman dizkio Osakidetzari baheketa egiteko jarritako baliabideengatik. Gogoratu behar da, lehen bi egunetan, eta batez ere joan den asteazkenean ilara ikaragarri luzeak sortu zirela PCRak egiteko unean. Ostegunetik aurrera egoera bideratu eta ilararik ez zen izan probak egiteko unean.
