Lonjako obrei amaiera emateko lanen lizitazioa ireki dute
Lanek sei hilabeteko iraupena izango dute, zonaldea 2022. urte hasierarako gaituz. Biribilgunearen alboko lursaila zolatu eta harmaila bat eraikiko dute.
Obren bigarren fasearekin egungo eraikinaren atzealdean zoladura jarriko dute, lehien fasekoarekin elkartuz. 
Pasaiako Portu Agintaritzak San Pedroko lonjako lanei amaiera emango lieketen obren lizitazioa ireki du. Bigarren faseko obrek sei hilabeteko iraupena izango dute; aurreikuspenen arabera, lonjako obrak guztiz amaituta eta zonaldea erabilgarri izango da 2022. urte hasieran.
Fase berria hasita, barrutiko sarbidean dagoen biribilgunearen alboko zonaldea urbanizatzea aurreikusi dute. Zolatze lanak ia 1.300.000 eurogatik finantzatuko dituzte Pasaiako Portu Agintaritzak eta Gipuzkoako Foru Aldundiak.
Lanen nondik-norakoak
Lehiaketara atera berritako obrekin, San Pedroko biribilgunearen alboan hasi eta lonjako eraikinera arte doan lursailean zoladura jarriko lukete, berriki inauguratutako plazatxoarekin bat eginez.
Horrez gain, lonjako eraikinari atxikitako harmaila bat ere eraikitzea aurreikusten du bigarren aldiaren planak.
Fase honetan gaituko duten lurrak lehen faseko antzeko eremua hartzen du dimentsioei dagokienez. Gauzak horrela, bi zatitan gaitutako lanek eremu bakarra osatuko dute, alde batean San Pedroko hirigunea izango duena, eta bestetik lonjako bulegoen eraikin berriak mugatutakoa. Eraikin horretan, iragarri dutenez, aurki ekingo zaio jardunari.
