Pasaia KE-k azken postuan hasi du Bigarren B Mailara igotzeko play-offa
Pasaitarrek 4-0 galdu dute Gernikaren kontra, igoera faserako lehen jardunaldian. Multzoko lehen biak zuzenean igoko dira Bigarren B-ra.
Pasaia Kirol Elkarteak joan den larunbatean jokatu zuen Bigarren B Mailara igotzeko play-offeko lehen partida, Gernikaren aurka 4-0 galduz, etxetik kanpo.
Gauzak horrela, azken postuan daude pasaitarrak sailkapenerako multzoan -seigarren, hain zuzen ere-. Bertara azken faseko puntuekin heldu dira, eta Pasaiak abiapuntuan bezala jarraitzen du: 34 punturekin. Lehen taldeak (Gernika) 12 puntuko errenta ateratzen die zuri-gorriei gaur-gaurkoz.
Sei partida jokatuko dituzte orotara fase honetan, joan-etorrian. Horiek amaitzean, lehen bi postuetan gelditu direnak zuzenean igoko dira Bigarren B Mailara. Kanpo gelditutako gainontzekoek azken aukera bat izango dute mailaz igotzeko, kanporaketan, partida bakarra jokatuz -onena izango da sailkatutako hirugarren kluba-.
