Gaur hasi dute matrikulazio kanpaina Uztargi eta Goialde haur eskola publikoek
Bi haur eskoletan ordutegia bera dute, 07:30etik 17:00etara, "malgutasunez egokitzen dugu haur eta familien beharretara". Hilaren 21era arte dago zabalik matrikulazio epea.
Alastruy, SAnchez eta Ostolaza gaurko agerraldian Goialde Haur Eskolako jolastokian. Gaur zabaldu dute matrikulatzeko epea Goialde eta Uztargi haur eskola publikoetan. Horren berri eman eta matrikulazioaren hasiera modura, agerraldia eskaini dute Itziar Ostolaza Hezkuntza zinegotziak, Maider Sanchez Garmendia Goialde Haur Eskolako koordinatzaileak, eta Maripi Alastruy Etxenike Uztargi Haur Eskolako koordinatzaileak. Agertoki ezin egokia aukeratu dute, Goialde haur eskolako patioa. Izan ere, COVID-19ak eragindako agertokian, hezkuntza proiektuak aurrera eramateko espazio ezin egokiago bilakatu dira aire librean dauden patio eta zona berdeak. Horren jakitun, Goialde haur eskolan indartu egin dute jolastokia, espazio atsegin, erabilgarri eta hezitzaileago bihurtzeko.
Uztargik, bere aldetik, zonalde berde zabalak dituela aire librean haurrekin aritzeko zehaztu dute, haur eskolaren aurrealdean zein atzealdean.
2020an eta aurten jaiotako 246 haurren etxeetara bidali du gutuna udalak; haur eskolen eskaintza zehatza helarazi diete familiei horien bidez. Horren harira, Errenteria-Oreretan hezkuntza eskaintza anitza eta zabala dagoela 0-2 urte adin tartean ere nabarmendu du Ostolazak, “aniztasun horrek ekosistema aberatsa eskaintzen du hezkuntzaren eremuan, familiaren eta haurraren beharretara ondoen egokituko den eskaintza hautatzeko aukera eskainiz”.
Errenteriako Udalak urteak daramatzala haur eskola publikoen kanpaina sustatzen gaineratu du zinegotziak,”zinez uste dugulako 0-2 etapa horren eskaintza funtsezkoa, behar-beharrezkoa dela, eta pandemia agertoki honetan hainbatetan aipatu diren bi osagai uztartzen dituzte haur eskolek, zaintza alde batetik eta hezkuntza, bestetik. Hezkuntza oin garrantzitsua da garapen afektibo, emozional eta psikomotorraren testuingurutik ulertuta, gure herriko haurren hezkuntza garapenez arduratzen diren bi eskola dira”. Eskaintza zabal eta anitza dagoela ekarri du gogora bestalde, “herriko familiak aske dira haur eskola aukeratzeko garaian, baina guk indartu egin nahi dugu, azken finean, haur eskola hauek badutelako diru laguntza eta hobari sistema bat hain justu ere, maila sozio ekonomiko edo sozio kultura edozein dela ere herritar guztientzat irisgarri egiteko”.
D eredua ere aipatu du Ostolazak, eta horren aldeko hautua egin dezaten eskatu die familiei.
Ezaugarriak
Eusko Jaurlaritzak ezarritako ratioen arabera, 0-1 urteko gelan zortzi haur dira gehienez, eta 1-2 urtekoen gelan berriz, hamahiru. Bi haur eskola publiko horietan gainera, bi hezaitzaile duade etengabe haurrekin, eta beraiek ematen diete jaten eta lotarazten dituzte.
Goialde Haur Eskolan bi gela daude, eta bertako etxeko giroa nabarmendu du koordinatzaileak, “familiarteko giroa bermatzen dugu. Gainera inguruan aparkatzeko arazorik ez dagoenez ez dute gurasoek presaka ibili behar. Hezitzaileek etengabeko formazioa jasotzen dute, eta haur bakoitzaren mugimendu librea errespetatzen da”.
Uztargik, bost gela handi eta belargunea ditu. Sukaldariak egunero prestatzen du jatordua eta gainera, produktu ekologikoz osatzen du haur eskola horretako koordinatzaileak zehaztu duenez”.
Bi haur eskoletan ordutegia bera dute, 07:30etik 17:00etara, “malgutasunez egokitzen dugu haur eta familien beharretara”.
Gaurtik, hilaren 21 arte dago zabalik izena emateko epea bi haur eskoletan, telematikoki esteka honetan, eta presentzialki haur eskoletan bertan 09:00etatik 14:00etara.
