[Bideoa] Merkatari eta ostalarien alde 'boga' egingo dute pasaitarrek
Pasaiako Udalak, Laurak Batekin elkarlanean, 'Boga Pasaia' kanpaina abiarazi du udalerriko txikizkako merkataritza eta ostalaritza aintzatesteko. Bideo bat sortu dute.
Gaur goizean udaletxean egin dute 'Boga Pasaia' kanpainaren eta horren baitako bideoaren aurkezpena. 
Pasaiako ostalari eta merkatariek norabide berdinerantz boga egin dute, Boga Pasaia kanpainaren magalpean argitara atera berritako bideoan. Iniziatibaren helburua udalerriko txikizkako merkataritzaren eta ostalaritzaren balioa aintzatestea da, COVID-19ak eragindako kalteei aurre egiteko, bizilagunek zero kilometroko produktu eta zerbitzuak lehenets ditzaten.
Pasaiako Udalak Laurak bat Pasaiako merkatari elkartearen eta ostalaritzako ordezkarien laguntzarekin jarri du abian kanpaina, eta gaur goizean aurkeztu dute udaletxean alkateak nahiz sektoreko hainbat langilek. Izaskun Gomezek udalerria biziberritzearen garrantzia nabarmendu du agerraldian: “kanpainaren helburua da pasaitarrek Pasaiako ostalaritza eta merkataritza-establezimenduetan kontsumitzea, horrek Pasaiari bizia ematen diolako”.
Boga Pasaia ezagutzera emateko udal markesinak baliatuko dituzte, udalerriko establezimenduetan kartelak ipini eta bideoa pasaitarren artean zabaltzearekin batera. Horrekin guztiarekin, hiru helburu dituzte:
- Tokiko merkataritza eta ostalaritza bultzatzea, kontsumoa sustatuz.
- Pasaiako herritarren eta bertako merkataritzaren arteko lotura emozionala duen irudi bat sortzea.
- Herritarrei erakustea bertako establezimenduetan erosi eta kontsumitzeak dituen onurak: gertutasuna, jasangarritasuna, eta tokiko ekonomia bultzatzea.
Iniziatibaren baitan kokatu ditu udal arduradun nagusiak orain arte martxan jarritako beste hainbat saiakera ere: kontsumo-bonuak, ostalarientzako laguntzak, eskolako materiala erosteko laguntzak…
