Delituek gora egin dutela-eta Segurtasun Mahaia deitzeko eskatu du PSE-EEk
2020an Araba, Bizkai eta Gipuzkoan egindako delituen memoria publiko egin du Eusko Jaurlaritzaren Segurtasun Sailak. Horren arabera, Errenterian %3,54 egin dute gora delituek iazko urtarriletik abendura bitartean. PSE-EE "kezkatuta" azaldu da eta Segurtasun Mahaia deitzeko eskatu du.
Isaac Palencia, PSE-EEren bozeramailea. Argazkia: PSE-EE 2020an Araba, Bizkai eta Gipuzkoan egindako delituen memoria publiko egin du Eusko Jaurlaritzaren Segurtasun Sailak. Horren arabera, Errenterian %3,54 egin dute gora delituek iazko urtarriletik abendura bitartean. PSE-EE “kezkatuta” azaldu da eta Segurtasun Mahaia deitzeko eskatu du.
Delitu kopuruak epe horretan behera egin dutela Gipuzkoan (%14,62 gutxiago), Donostian (%11,33 gutxiago), Irunen (%5,44 gutxiago), Eibarren (%5,23 gutxiago) eta Pasaian (%8,43 gutxiago) esan du PSE-EEk komunikabideetara helarazitako prentsa oharrean. Lesio delituak eta ondarea eta ordenu sozio-ekonomikoaren aurkakoek egin dutela gora erantsi du alderdi sozialistak, horren harira, familia arteko tratu txarrak (25 izan ziren 2019an, 34 2020an), indarra erabilita etxebizitzetan egindako lapurretak (2019. urtean 26, eta 2020an 30 izan ziren), garaje eta ganbaretan egindakoak (10 izan ziren 2019an eta 32 2020an), enpresetan indarra erabilita egindako lapurretak (4 izan ziren 2019an, eta 7, 2020an), komertzio eta leku itxietan egindako lapurretak (2019an 49 izan ziren, eta 2020an 80) eta iruzurrak (2019an, 105 eta 2020an, 306) nabarmendu ditu.
Haien ustez, “larria” da egoera eta Errenteriako Udaleko segurtasun mahaia deitzea “premiazkotzat” jo dute, “txosten horretan azaltzen diren datuak aztertu eta neurriak hartzeko”. EH Bildu eta Aizpea Otaegi alkateari “arazoa minimizatzea” egotzi die PSE-EEk: “Duela hilabete prentsa aurrera atera ziren datu partzialak emanez, soilik Udaltzaingoarenak, Ertzaintzarenak publiko egin aurretik”.
PSE-EEk Udaltzaingoan “hutsik diren lanpostuak” betetzeko eskatu du, gizarte zerbitzuak indartu eta Emakumeen Etxearekin elkarlana hobetzeko eskatu du indarkeria matxista kasuak detektatzeko. Poliziaren presentzia handiagoa kaleetan ere eskatu du alderdi sozialistak. Bide beretik, iruzur delituei aurre egiteko, horiek egiten ari direla jakin bezain pronto herritarrei jakinarazteko eskatu du.
