Komunikabideei arduraz jokatzeko deia egin die mugimendu feministak
"Kazetaritzak hitzekin egiten du lan, eta hitz horiekin ere markatu eta hezten gaituzte", esan du mugimendu feministak.
Mugimendu feministaren protesta bat. Artxiboko irudia.
Haserre azaldu da Oreretako Mugimendu Feminista. Ez da gutxiagorako. Herenegun eta atzo, asko izan ziren Errenterian emakume bat bortxatzeagatik gizon bati hiru urte eta erdiko espetxe zigorra ezarri dioten berria zabaldu zutenak. Hori da albistea, bortxatzaile bati hiru urte eta erdiko espetxe zigorra ezarri diotela. Titularrera, baina, beste elementu bat eramatea erabaki zuten komunikabide batzuk, emakumea berriro biktimizatuz, eta erabaki zuten “garrantzitsua” zela aipatzea “mozkorra” zegoela.
Emakumea erruduntzat hartu dutela gizartearen aurrean salatu du mugimendu feministak, “ideologia heteropatriakalean kondenatzen gaituzten aurreiritziek, gure jarrera nolakoa izan behar duen ezartzen digute. Mozkorra dagoen emakume bat sexualki erasotzen dutenean, bortxatzen dutenean, errua, neurri batean, berari egozten zaio kontrola galdu izanagatik”.
Beste titular egokiagoa ere iradoki du mugimendu feministak: “Hiru urte eta erdiko zigorra ezarri diote gizon bati, Errenterian lagun batzuen etxean lo zegoen emakume bat bortxatzeagatik”. Ez dago interpretaziorako tarterik, ez dago dudarik, gertatutakoa garbia da: Gizona da delituaren erantzulea, bera da bortxatzailea,baina, “emakumea izan da epaitua sare sozialetan, nahikoa da!”
Ardura eskatu diete komunikabideei, indarkeria matxista jendartearen arazoa delako, denek dutelako eraiki eta deseraikitzeko asko estrukturala, eta modu askotakoa den, indarkeria matxistarekin amaitzeko: “Kazetaritzak hitzekin egiten du lan, eta hitz horiekin ere markatu eta hezten gaituzte”.
