Miarritzeko hilketa matxista salatzera deitu dute bihar
Udaleko alderdi politiko guztiek adierazpen instituzionala adostu dute aho batez hilketa matxista salatzeko; mugimendu feministak deitu duen elkarretaratzearekin bat egin du udalak.
Miarritzeko hilketa matxista salatuko du bihar Oreretako Mugimendu Feministak. Horren harira, elkarretaratzera deitu du bihar, 13:00etan Gamon Zumardian eta herritar guztiak deitu ditu parte hartzera.
Atzo aurkitu zuten 75 urteko emakumearen gorpua haren etxean, baita, 77 urteko senarrarena ere. Senarrak hil zuen emaztea.
Biharko mobilizazioa, Emakumeen Mundu Martxak egindako deialdiaren harira egindakoa da. Miarritzekoa aurten Euskal Herrian izandako hirugarren hilketa matxista da.
Adierazpen instituzionala
Azken hilketa matxista salatzeko Oreretako Mugimendu Feministak deitu duen elkarretaratzera deitu ditu herritarrak udalak. Protestarekin bat egin du, gaur bertan zabaldu duen adierazpen instituzionalean. Adierazpen hori, alderdi politiko guztiek adostu dute aho batez, eta hilketa matxista erabat gaitzestearekin batera, emakumeak indarkeria matxistarik gabe bizi daitezen lanean jarraitzeko konpromisoa berretsi du. Herritarrak eta bereziki gizonak, beren jarrera eta jokaerei erreparatzera deitu ditu, halaber, eta edozein erasoren aurrean jarrera aktiboz jokatzera.
Elkartasunik beroena adierazi diote emakumearen familiari, eta herritar guztiak deitu ditu bihar 13:00etan Zumardian deituta dagoen elkarretaratzearekin bat egitera.
