Pasaiako udaleku irekietan izena emateko epea zabalik da
Inskripzioak gaurtik hasita maiatzaren 5era arte egin ahal izango dituzte udalerriko gazteek. Udalekuak uztailaren 1etik 30era izango dira.
Izena eman dezakete Haur Hezkuntzako 5 urteko gelaren Lehen Hezkuntzako 4. mailen artean dauden Pasaiako haurrek. 
Pasaiako haurren udaleku irekietan izena emateko kanpaina ireki dute, gaurtik maiatzaren 5era arte. Inskriba daitezkeen gazteek udalerriak erroldatuta egon beharko dute, eta 2011-2016 (biak barne) urteen artean jaioak izan behar dira -Haur Hezkuntzako 5 urteko gelatik Lehen Hezkuntzako 4. mailara arte, alegia-.
Udalekuak uztailaren 1etik 30era izango dira, 9:30etik 13:00etara, astelehenetik ostiralera. Egingo dituzten jarduerak hurrengo asteetan zehaztuko dira, egoera soziosanitarioaren bilakaera kontuan hartuta. Hasiera batean, denbora gehiena aire zabalean egotea eta, ahal izanez gero, irteera batzuk egitea izango da helburua.
Guztira 210 haurrentzako tokia egongo da udalekuetan, eta horiek seiko taldeetan banatzea aurreikusi dute. Izen-emate kopurua handiagoa bada, zozketa egingo da.
Izen-ematea eta ordainketa
Hileko kuota 79,50 eurokoa da, eta hobariak izango dira familiaren errentaren baitan. Horretarako HAZeko bulegoetan aldez aurretik kontsulta egin beharko da. Ordainketa haurraren izenean egin beharko da kontu korronte honetan: Kutxabank ES55-2095-5400-02-1061652334.
Haur, Nerabe eta Gazteen Sustapen Sailak Udaleku Irekietan izena emateko eta informazioa lortzeko sistema bikoitza diseinatu du:
- Donibaneko, Antxoko eta Trintxerpeko HAZ (Herritarren Arreta Zerbitzua) bulegoetan. Horretarako, hitzordua eskatu beharko da 943 34 40 34 telefono zenbakira deituz.
- Online, hemen klik eginda. Horretarako, ziurtagiri digitala behar da. Ziurtagiri digitala B@kQ HAZ bulegoetan eskura daiteke, aurrez hitzordua eskatuta (943 34 40 34).
Informazio orria eta izena emateko formularioa Pasaiako ikastetxeetan banatu dute jada, baina HAZeko bulegoetan ere dago eskuragarri, eta udalaren webgunean ere deskarga daiteke.
Izena ematerakoan, matrikula orriarekin batera, ordainagiria eta haurraren osasun txartelaren kopia aurkeztu beharko dira. Haur Hezkuntzako umeei dagokienez, nortasun agiriaren fotokopia, halakorik badu, edo hura agertzen den Familia Liburuaren orriaren kopia.
