[Galeria] XXXIII. Sagardo Egunaren zuhaixkak landatu dituzte
Hilaren 24ean oreretarrek etxean 'txotx' egin dezaten egitaraua prestatu dute. Lau omenaldi berezi egin dituzte, bakoitzaren omenez sagarrondo bat landatuz.
Errenteria-Oreretako XXXIII. Sagardo Eguna aurkeztu dute gaur goizean Arramendin. 
Gaur goizean Arramendin aurkeztu dute Errenteria-Oreretako XXXIII. Sagardo Eguna, eguzkia lagun. Egungo egoera dela eta, egitarau berezia prestatu dute bizilagunek euren etxeetan txotx egin dezaten. Lau sagarrondo landatu dituzte; bakoitzarekin, omenaldi berezi bat.
Hilaren 24koa ezohiko Sagardo Eguna izango da, bigarren urtez jarraian. Dena den, pandemiak ere ez du ase egin oreretarren ospatzeko egarria, eta hainbat ekintza antolatu dituzte aurtengorako ere -egungo osasun egoerak baimentzen duen neurrian, betiere-. Antolakuntzan ari den Idoia Arbelaitzek aurkeztu ditu larunbateko jarduerak; horiek guztiak online jarraitu beharko dira, Sagardo Egunaren webgunean nahiz sare sozialetan zabaldutako estekaren bitartez:
- 11:00etatik 14:30era Xenpelar plazan nahiz Gamon Zumardian XXXIII. Sagardo Eguneko edalontzia hartu ahal izango dute bizilagunek, eta baita sagardo botilak ere, etxean txotx egiteko.
- Sagardotegi batean bazkaltzeko gonbidapenen zozketa egingo dute postuetan banatutako edalontziren bat eskuratzen duten guztien artean.
- 13:00etan Sagar Dantza egingo dute.
- 17:00etan trikitilariek eguna girotuko dute herriko hainbat txokotatik.
- 20:30ean DJ Bull-ek emanaldia eskainiko du, amaiera ordu zehatzik gabe (indarrak agortzen zaizkion arte, antolakuntzaren arabera).
Omenaldiak
Arbelaitzek mintzaldia baliatu du Gautxori elkarte gastronomikoko kide Bixente Ibarguren Agirre omentzeko. Oreretarra iaz zendu zen, Sagardo Egunaren antolaketa lanetan urteak eta urteak eman ondoren: “Berdin zion adinak, berdin zion orduak. Hori bai! Siesta garaian ez jarri hitzordurik. Beti prest”, egin dio aipamena kideak.
Gertukoen artean betiko bizi dadin, sagarrondo bat landatu dute Arramendiko sagastian. Halaber, herriko elkarte gastronomiko eta ostalariak ere goretsi dituzte, zuhaixka bana landatuz horiengatik ere. Azken arbola Sagardo Eguneko Batzordearen izenean jarri dute.
