Hamaika Gararen sinadura bilketa, gaur goizean, Oiartzunen
11:30ean hasi eta 13:30ak arte bilduko ditu sinadurak erabakitzeko eskubidearen aldeko herri dinamikak, Done Eztebe plazan.
Erreferendum bidez erabakitzearen aldeko atxikimendu eta konpromiso pilaketa masiboa da Hamaika Gara egitasmoa. Erabakitzeko eskubidea gauzatzearen aldeko jarrera nagusia ikustaraztea du helburu, eta Euskal Herriko lurraldeetan urrats eraginkorrak egitea. Gure Esku herri mugimenduaren eta alor anitzetako eragileen arteko elkarlana eta sarea ditu oinarri egitasmoak. Horren harira, herriz herri sinadurak biltzeko egitasmoa abiatu dute, eta gaur goizean, Oiartzunen txanda izango da.
Sinadurak izenpetzeko gunea Done Eztebe plazan jarriko dute, 11:30etik 13:30era. Sinaduren erronka dute abian Hamaika Garakoek, eta ahalik eta izen-abizen gehien bildu nahi dituzte erabakitzeko eskubidearen alde.
Horrez gain, kanpainaren eskumuturrekoa eskuratzeko aukera dagoela adierazi dute. Hiru bide jarri dituzte horretarako
- Gure Eskuko kideei eskatzea.
- Hamaika Gararen webgunetik eskatzea.
- Berria egunkariaren bidez lortzea.
