Euskarari 'mamia aterako' diote Oarsoaldeko okindegiek
81 establezimenduk egin dute bat eskualdeko lau udalek abiarazitako kanpainarekin. Hizkuntzaren erabilera sustatzeko hainbat baliabide banatu dizkiete jabeei.
Gaur goizean aurkeztu dute 'Atera mamia euskarari' kanpaina, Errenteria-Oreretako Fanderia okindegiaren kanpoaldean. 
Hogeita lau urte dira Oarsoaldeko lau udalak, Oarsoaldeko Euskara Batzordearen bitartez, merkataritzan eta ostalaritzan euskararen normalizazioa sustatzeko elkarlanean ari direla. Urtero gremio bat hautatzen dute bertan euskararen erabilera indartzeko, eta 2021ean okindegi-gozotegiak izango dira protagonista, atera mamia euskarari lelopean.
Errenteria-Oreretako Fanderia okindegian aurkeztu dute gaur goizean aurten eskualdeko okindegiei zuzenduko dizkieten ekintzak. Topaketarekin bat egin dute honakoek: Eneko del Amo, Errenteriako Garapen Ekonomikoko zinegotzia; Loreto Osa, Pasaiako Euskara zinegotzia; Josu Delgado, Oiartzungo Euskara zinegotzia; Laura Muñoz, Lezoko Ogasun zinegotzia; Maika Martin, Errenkoalderen ordezkaria; Ander Lizarralde, Itturriren ordezkaria; eta Edurne Mitxeo, Lezokoak elkarteko ordezkariak.
Hainbat doako baliabide banatu dizkiete iniziatibari atxikitako okindegiei eta Osak horiek guztiak banan-banan aurkeztu ditu; honakoak dira:
- 100 egun, 100 hitz egutegia. Hilaren 14tik uztailaren 22ra bitartean euskarazko hitz bat ikasteko aukera emango zaie euskaraz ez dakiten merkatariei eta ogiarekin loturiko esaera bat ikasteko aukera merkatari euskaldunei.
- Kartoi lumazko panelak ohikoen diren 14 ogien euskarazko izenekin.
- Sariak bezeroentzat. Urriaren 15etik azaroaren 15era, establezimenduetako produktuak euskaraz eskatzen dituzten bezeroei txarteltxo bat emango die saltzaileak zozketa batean parte hartzeko. Establezimendu bakoitzeko irabazle bat aterako da eta hilabeteko ogia (50 euroko erosketa eskubidea) eskuratuko du onuradunak.
- Itzulpena. Jendaurrean dituzten idatzi eta oharrak euskaraz jartzen lagundu diete (itzulpenak, maketazioa, paisaia linguistikoa euskalduntzeko euskarriak, aholkularitza teknikoa…).
- Horrezaz gain, okindegietako hiztegitxoa ere banatu zaie.
Dagoeneko 81 establezimenduk egin dute bat kanpainarekin, baina arduradunek ohartarazi dute okindegi-gozotegiren batek iniziatibaren berri jaso ez balu eta interesik izango balu, garaiz dabilela oraindik ere: bere herriko euskara zerbitzuarekin harremanetan jarri besterik ez du. Honakoak dira kontaktuak:
- Errenteriako Euskara Zerbitzua. 943 449 613 (Herriko enparantza z/g).
- Lezoko Euskara Zerbitzua. 943 513 476 (Donibane kalea 2).
- Oiartzungo Euskara Zerbitzua. 943 493 842 (Fermiñene etxea. Aialde, 2).
- Pasaiako Euskara Zerbitzua. 943 004 330 (Euskadi etorbidea 61, Trintxerpe).
