Lezoko EH Bildu: "EAJk eta PSE-EEk emandako hitza jan dute"
Udal gobernuak aurrekontuei aurkeztutako emendakinak azalpenik eman gabe ukatu egin dituzteka salatu dute koalizioko kideek.
Lezoko EH Bilduren hainbat zinegotzi, artxiboko irudian. Lezoko EH Bilduk salatu du udal aurrekontuei egindako emendakin guztiak baztertu egin dituela EAJk eta PSE-EEk osatzen duten udal gobernu taldeak. Koalizioko kideek zehaztu dute EAJko eta PSE-EEk zinegotziak bilkideen emendakinak aztertzeko prest zirela. “Baina ez dute gurekin elkartu nahi izan hitz egiteko ere, beraien hitza janez beste behin”, esan dute koalizioko ordezkariek. Urtarrilerako ezarri zuten biltzeko data gobernukideek.
EH Bilduk udal aurrekontiei hemezortzi emendakin aurkeztu zizkion, baztertuak izan direnak. Horiek 445.900 euroko zenbatekoa biltzen zuten. Koalizioko kideek aurkeztutako eta onartuak izan ez diren emendakinen berri emateko baliatu du hedabideetara bidalitako oharra. Honakoak dira, hitzez hitz, koalizioak nabarmendu dituen emendakinak:
-
Etxez-etxeko zerbitzua eta etxez-etxeko langileen baldintzak hobetzeko 85.000 euro gehiago. Zerbitzua zabaltzeko eta hobetzeko langileen plantilla kopurua bi langile gehiagorekin handitzea proposatu genuen, horretarako 78.000 euro bideratuz. Horrekin batera, langileek babes material nahikoa izan dezaten, babeserako arropa eta materialen partida 7.000 euro gehiagorekin handitzea proposatu genuen.
-
Enplegu plana indartzeko 85.000 euro gehiago.
-
Krisialdiak norbanako eta familiengan sortutako eraginei aurre egiteko 45.000 euro gehiago.
-
Herriko ostalaritza, merkataritza, autonomo eta enpresa txikien jarduera ekonomikoa indartzeko 110.000 euroko partida sortzea proposatu genuen.
-
Biolentzia matxistari aurre egiteko 15.000 euroan handitzea berdintasun partida.
-
Adin txikikoen atentzioan 10.000 euro gehiago. Itxialdi eta murrizketek gehien eragin dion sektoreetako bat dugu. Berebiziko garrantzia izan behar du arlo psikologiko-afektibo-emozionalean erreparatzea eta zaintzea.
-
Arrakala digitala ekiditeko 10.000 euroko laguntza partida sortzea. Lehendik ere pisua zuen mundu digitalaren indartzea ekarri du pandemiak. Telelana edo ikasketak online bidez jarraitu beharra jarduera arrunt bilakatu zaizkigu. Horretarako, gailu teknologiko eta konexio sare egokiak izatea oso garrantzitsua da.
-
Euskararen plan estrategikoa gauzatzeko 10.000 euroko partida sortzea.
