2021eko Pasaiako Dantza Festibala ikastetxeetara eramango dute
Jaialdiaren hirugarren edizioa ekainaren 10etik 13ra ospatuko dute. Dantza Pasaiako ikastetxeetan txertatzeko sentsibilizazio kanpaina bat abiarazi dute.
Artxibo irudia. Joan den edizioko ikuskizuna. 
Pasaiako Dantza Festibalaren III. edizioak badu data ofiziala: ekainaren 10etik 13ra ospatuko dute aurtengoa, eta egitarauak berritasun nagusi bat dakar: dantza hezkuntzan txertatzeko sentsibilizazio jarduera bat, hain zuzen.
Antolatzaileek adierazi dute iniziatiba hura “pauso handi eta oso garrantzitsua” dela festibalarentzat, batik bat gerora begira: “Etorkizunean, dantza sorkuntzak ulertzen lagundu eta sortzaile eta dantzariekiko harreman naturala sustatuko baitu”.
Gauzak horrela, aste honetan hasi eta ekainera bitarte, Haatik Dantza Konpainiako kideek, Pasaiako Udalaren babesarekin, dantza ikasleengana hurbiltzeko balioko duten tailer bereziak eskainiko dituzte Pasaiako hiru ikastetxeetan: Karmengo Ama Ikastetxea, La Anunciata Ikastetxea eta Pasaia Lezo Lizeoan.
