78 hegazti espezie habiagile identifikatu dituzte udalerrian
Hautemandakoen artean badira "bakan" gisa katalogatutako batzuk, eta baita "arriskuan" dagoen espezieren bat ere. Ikerketak lau urte iraun ditu.
Egunera arte ez zegoen Errenteria-Oreretan ugaltzen diren hegaztien inbentariorik. Argazkia: Juan Arizaga. 
Errenteriako Udalak, Aranzadiko Ornitologia sailarekin elkarlanean, udalerriko hegazti habiagileak protagonista dituen ikerketa zientifikoa burutu zuen iaz. Ikerketa horrek 2016-2020 epealdia hartu zuen, eta helburu nagusia hegazti espezieen inbentarioa egitea eta horien banaketa ezagutzea zen.
Errenteria-Oreretaren zati bat Euskal Herriko biodibertsitatea kontserbatzeko interes handia duten natura-guneek osatzen dute. Adibide garbia da Natura 2000 Sarean kokatuta dagoen Aiako Harriko Parke Naturalaren eta Kontserbazio Bereziko Eremuaren (KBE) kasua.
Gaur-gaurkoz, udalerriak ez du bertan ugaltzen diren hegaztien inbentario zehatzik, ez aberastasunari dagokionez (espezie kopurua), ez espezieen espazio-banaketari eta haien ugaritasunari dagokienez ere.
Ikerketaren emaitzak
2016-2020 epealdian, udalerrian habiak egiten dituzten 78 hegazti espezieren 2.109 aipamen jaso dira.
Espezie horien artean, Arriskuan dauden Espezieen Euskadiko Zerrendan “bakan” gisa katalogatutako batzuk daude, hala nola: arrano txikia, okil beltza, belatz handia edo zuhaitz belatza. “Arriskuan” katalogatutakoen aipamenak ere aurkitu dira (miru gorria).
Ornitologia Saileko zuzendari den Juan Arizagak azterketa sakonago bat egitearen garrantzia nabarmendu du, hegazti habiagileen inbentario zehatzagoa egiteko eta, horrela, kontserbaziorako lehentasunezko guneei buruzko informazioa lortzeko.
