III. Berdintasun Plana diseinatzen hasiko dira Lezon
Hainbat planotan egingo dute plana osatzeko prozesua. Herriko norbanako eta eragileei parte hartzeko eskatu diete. Etxeetan galdetegiak banatuko dituzte.
Lezoko Udalak Emakume eta Gizonen Berdintasunerako III. Plana diseinatzeko prozesua abiatu du, 2021-2024 urteen arteko iraupena izango lukeena. Udaletik iragarri dute datozen hilabeteetan garatuko dela prozesua, eta herritarren parte hartzeak tartea izango duela, Murgide aholkularitzaren laguntzarekin. Herriko norbanako zein eragileak parte hartzera deitu dituzte bereziki.
Hainbat planotan garatuko dute diseinua. Batetik, udal langile zein politikariek eta herriko eragileek era koordinatuan jardungo dutela jakinarazi dute udaletik: horretarako topaketak, elkarrizketak eta galdetegiak egingo dira. Bestetik, berdintasunean alorreko datuak eta estatistikak berrikusiko dira, aurrerapenen edo hobetu beharrekoen berri izateko.
Zenbait talde osatu dira: politikariak, udal teknikariak, euskara, kultura eta kirol arloetako eragileak, emakumeak eta talde feministak, gazteak eta hezkuntzaren arloko eragileak. Gainera, udal langileentzat eta herritarrentzat galdetegiak egin dira, dituzten proposamenak jasotzeko.
Galdetegiak lezoar guztien etxeetara iritsiko dela adierazi dute udal iturrietatik, eta maiatzaren 31ra arteko epea dagoela egin eta emateko. Aldi berean, inkesta udalaren webgunean ere egongo dela adierazi dute.
