LGTBIfobiaren kontra, kulturarekin
Errenteriako LGTBI+ Mahaiak LGTBIfobiaren kontrako egunaren harira hainbat jarduera antolatu ditu, den-denak kulturaren esparrukoak.
Valeria Vegasek maiatzaren 22an aurkeztuko du bere azken liburua herrian. LGTBIfobiaren kontrako jardunaldiak antolatu ditu Errenteriako Udalak, LGTBI+ Mahaiarekin elkarlanean. Maiatzaren 6an hasi eta 22an bukatuko dira iniziatibarekin lotutako jarduerak, denak kultur esparrukoak. Maiatzaren 17a da LGTBIfobiaren Kontrako Nazioarteko Eguna, eta horren harira prestatu dira saioak. “Aniztasun afektibo-sexuala eta sexu zein genero aniztasuna ikustarazteko eta askatasunez bizitzeko eskubideen defentsarako osatu da programazioa”, nabarmendu du udalak.
Ekitaldi guztiak presentzialak eta doan dira. Baina horietara joateko, osasun segurtasun neurriek eskatzen dituzten aforo mugengatik, gonbidapenak behar dira. Horiek Niessen Kulturguneko harrera bulegoan har daitezke, astelehenetik ostiralera 10:00etatik 13:00eta goizez eta 17:00etatik 20:00etara arratsaldez. Gonbidapen horiek Internet bidez ere eskura daitezke.
Ondokoa da jardunaldien egitaraua.
- Maiatzak 6 (osteguna). 19:00etan, Niessen Kulturgunean, Zinegoak Bilboko Gaylesbitrans Nazioarteko Zinema eta Arte Eszenikoen Jaialdian ikusi ahal izan zen Valentina film luze brasildarra, jatorrizko hizkuntzan eta euskarazko azpitituluekin.
- Maiatzak 7 (ostirala). 18:00etan, Niessen Kulturgunean, Eidabe konpainiaren eskutik Meri, Mari eta Lari haurrentzako antzerkia.
- Maiatzak 8 (larunbata). 19:00etan, Niessen Kulturgunean, Zinegoak Bilboko Gaylesbitrans Nazioarteko Zinema eta Arte Eszenikoen Jaialdian ikusi ahal izan ziren hainbat film labur: Leo y Alex en pleno siglo XXI (Espainia), All I need is a ball (Espainia), Panteres (Espainia), Mall (Alemania), Eskuak eta hegoak (Hego Korea), Karaoke (Argentina). Jatorrizko hizkuntzan eta euskarazko azpitituluekin proiektatuko dira.
- Maiatzak 17 (astelehena). LGTBIfobiaren kontrako bandera jartzera deitu ditu errenteriarrak LGTBI+ Mahaiak. LGTBIfobiaren Kontrako Eguna da.
- Maiatzaren 22an (larunbata). 12:00etan, Merkatuzarreko Jose Luis Caso aretoan, Valeria Vegasek bere azken liburua aurkeztuko du: Libérate. Espainiako Estatuan LGTBIQ kulturaren historia jaso du Madrilen bizi den kazetari, idazle, gidoilari eta dokumentalista valentziarrak lan horretan.
