Arrantza mundutik ingurumenaren zaintzara, 31 urte bete ditu Materrek
Zurez egindako azken euskal atunontzi handia izandakoak 12 urterekin utzi zion arrantza egiteari, museo bihurtu eta itsasoa zaintzeko lanetan hasteko.
Mater Ontzi Museoak 12 urterekin utzi zion arrantza egiteari, ingurumenarekiko sentsibilizazio lanei ekiteko. 
Mater Ontzi Museo Ekoaktiboak 31 urte bete ditu, eta hiru hamarkaden jardunbidea gogora ekarriz omenaldia egin nahi izan diote museoaren webgunean.
Hamabi urte zituela utzi zion zurez egindako azken euskal atunontzi handia izandakoak arrantza egiteari. Etxegoien familiak sortu eta zaindu zuen urte horietan zehar Mater, Getariako portuan sardinak, txitxarroak, berdelak, antxoak eta udako itsasaldi luzeetan arrantzatutako hegaluzea ekarri dituzte gogora gaur.
Atzean gelditu ziren arrantza lanak, baina ontzia biziberritu zuten orduan, baita norabidea zeharo aldatu ere: atunontzia museo bihurtu zuten. Sortzaileek argi dute kasualitaterik ez zela egon euren bidea Materrekin gurutzatu zen urtean: “Ez genizun utziko hondoratzen, beste hainbeste bezala. Desegitea, txatarra bihurtzea, desagertzea zure arrantza urteak amaitu izanagatik. Eta ezagutu genuen elkar, bat-batean zurekin maitemindu ginen…”.
Hala, 2001ean lotu zituen amarrak ontziak San Pedron, herritarrak tokiko ingurumenaren zaintzan eta kontserbazioan inplikatzera gonbidatuz. Hogei urte bete ditu Materrek ingurumenaren kontserbaziorako lanetan.
Zorion-gutun osoa irakurgai dago esteka honetan klik eginez.
