Handia da Luis Otaño
Luis Otaño txirrindulari profesional izandakoaren ibilbideari gorazarre egiteko aitortza ekitaldia egin dute gaur. Herriko kiroldegian, haren ibilbideaz goza daiteke.
Otaño, Genoveva Torrecilla emaztearekin. Erreka baserrian jaio zen Luis Otaño, 1934an. “Donostia eta Irun artean dagoen herri batean bizi naiz”, esaten zien mapan Errenteria kokatzeko zailtasunak zituztenei, horiek denak Italiakoak, Frantziakoak, Suitzakoak… Izan ere, herriaren izena mundu osotik barreiatu zuen Otañok. Txirrindulari profesional izan zen, handia. Gaur omenaldia egin diote Galtzarabordako kiroldegian. Txirrindularitzan, gizonen profesionaletan garaipenak lortu dituen errenteriar bakarra izan da, 24 orotara; horietatik bat Frantziako Tourrean, eta beste bi Espainiako Itzulian. Bigarren postuak, 25; hirugarrenak 23. Ondo sufritu eta landutakoak denak. Gipuzkoan gutxi, oso gutxi dira Otañoren palmaresa dutenak.
Luis Otañoren palmaresa.
Omenaldia une bat izan da. Arrasto iraunkorra utzi du, ordea, Galtzarabordako kiroldegian. Bertako sarreran Otañoren ibilbidea laburtzen duen argazki erakusketa jarri dute, eta ondoan, haren irudi erraldoia bi QR koderekin: batean sartuz gero, haren palmares osoa ikus daiteke; bestean, Frantziako Tourreko etapa irabazi zueneko ikus-entzunezkoa (1966ko edizioan, Privas eta Bourg d’Oisans artekoa). 1957an hasi zuen profesional ibilbidea errenteriarrak.
Ekitaldi xumea izan da gaurkoa. Otañok emaztea izan du ondoan, Genoveva Torrecilla. Aitortza ekitaldia Errenteriako Udalak nahiz Laguntasuna Txirrindulari Elkarteak eta Kromosoma artisautza tailerrak elkarlanean antolatu dute. Maite Gartzia Kiroletako zinegotziak azaldu du omenaldia lehenago egitekoak zirela, baina pandemiak den-dena atzeratu duela. Gaur izan da unea. Aipatu du omenaldiaren alde lan asko egin dutela Laguntasunak eta Kromosomak. “Eta izugarria da egin duzuna, Luis. Eskertzekoa. Txapeldun batena ez, txapeldun handi batena da zure palmaresa. Oso harro gaude. Nahiago genuke gorazarre ekitaldia handiagoa izatea, baina egoerak ez du hori baimentzen”, zehaztu du Gartziak.
Laguntasunaren izenean Nico Santesteban eta Alberto Monroy izan dira aitortza ekitaldian (azken hori aldi berean Kromosomako kide da). Monroyk aipatu du gaurko detailea egitearen sorburua bizikleta gaineko entrenamendu bat izan zela. “Eta helburua da belaunaldi berriei helaraztea zer nolako lana egindakoa den Otaño. Merezi du hark egindako lana belaunaldi berrietara iristea, txirrindularitza orain baino askoz ere gogorragoa zen garai baten testigantza ematea”.
Hainbat oroigarri eman dizkiote Otañori nahiz Torrecilla emazteari. Eta txirrindulari izandakoak ez du aukera galdu pasadizoren bat kontatzeko, adibidez, entrenatzeko Frantziatik Italiaraino joan zenekoa, bi egunean: “Garai hartan hori normala zen. Beste batean hemendik Andaluziara joan nintzen bizikletan, hango lasterketa batera. Zaku batean aldatzeko elastikoa, aldagarria eta ezer gutxi gehiago eraman nituen. Pijamarik ez. Hotelera iristean arropa maindire artean sartu nuen, lehor zedin”. Beste garai batzuk ziren, baina Galtzarabordan jarritako euskarrien bitartez, aro hura gaur da.
Alberto Monroy, Luis Otaño, eta Maite Gartzia gaurko agerraldian.
