Mugikorren kamerekin trebatzeko tailerra eta erakusketa antolatu ditu Bekoz Bekok
Antxoko emakume elkarteak lau saio antolatu ditu mugikorren kamerak erabiltzen ikasteko. Parte hartzaileek erakusketa eskainiko dute azaroaren 25aren harira.
Indarkeria Matxistaren Kontrako Nazioarteko Egunaren harira erakusketa eskainiko dute. 
Antxoko Bekoz Beko elkarteak sakelako telefonoarekin argazkiak egiten ikasteko tailer bat jarri du martxan. Denera lau saio egingo dituzte, guztiak larunbatetan, eta datorren honetan -hilak 8- egingo dute lehenengoa, mugikorrak nahiz horien kamerak erabiltzen ikasteko oinarrizko nozioak lantzen hasiaz.
Horrez gain, topaketan bertan, azaroaren 25ean (Indarkeria Matxistaren Kontrako Nazioarteko Eguna) parte hartzaileen argazkiekin egin asmo duten erakusketa ere antolatzen hasiko dira. Hona hemen tailerren data eta ordutegiak: Maiatzaren 8a eta 22a; eta ekainaren 5a eta 19a, 10:00etatik 13:00etara.
Izena eman dezakete interesdunek 679 33 24 11 telefono zenbakira idatziz edota dei eginez, edota elkartearen egoitzara bertaratuz (Zumalakarregi kalea, 7).
