35 urteko gizon bat atxilotu dute, atentatua eta droga trafikoa leporatuta
Ertzaintzak gizon bat atxilotu du bere ardurapean zuen lokalean substantzia sorgorgarriak saltzea egotzita. Autoritateari atentatua ere leporatu diote, agenteei aurre egiteagatik.
Bi kilo haxix, marihuana kilo bat eta bi doitasun-balantza hauteman zituzten lokalean. Ertzaintzak 35 urteko gizonezko bat atxilotu zuen joan den asteartean Pasaian, droga-trafikoaren delitua eta agintaritzaren agenteen aurkako atentatua leporatuta.
Arratsaldeko 18:30ak aldera, Ertzaintzaren patruila batek Pasaiako aisialdiko lokal bat irekita zegoela ikusi zuen, eta hainbat pertsona barrura sartu zirela, nahiz eta COVID-19ari aurre egiteko osasun-araudiak dioenez, lokalak itxita behar zuen.
Ertzainek jakinarazi dute bertako arduraduna “agenteei sarrera oztopatzen” saiatu zela, “haien kontra indar eginez”, eta atentatuaren delitua leporatuta atxilotu zuten, beraz.
Agenteak lokalean sartu zirenean, ustez, bertan zeudenek aitortu zieten droga erostera sartu zirela, eta lokala itxi egin zuten, geroago sartu eta miatzeko. Hurrengo egunean tabletatan banatuta zeuden bi kilo haxix hauteman zituzten lokalean, bai eta kristalezko ontzietan banatuta zegoen marihuana-kukuluen kilo bat eta bi doitasun-balantza ere.
