'Atzerrian lurra garratz' antzezlanak hausnarketa ekarriko du Donibanera
Hilaren 16ean herri eta deserriaz, emakume sortzaileen egoeraz, migrazioaz, zaintzaz, kolonizazioaz eta arrazismoaz diharduen obra taularatuko dute.
Huts Teatroa eta ArteDramaren eskutik, antzezlan berezi batek lur hartuko du Pasaian datorren hilaren 16ean -igandea-. Duela hamaika urte iritsi zenetik, euskal arte sorkuntzan bere lekua bilatzen ari den Laura Penagos kolonbiar jatorriko aktore euskaldunaren bizipen eta kezka pertsonalak gizarteratu eta kolektibizatuko ditu Atzerrian lurra garratz antzezlanak.
Laura Penagos bera eta Ander Lipus aktoreak arituko dira Juanba Berasategiko oholtza gainean, Amancay Gaztañagaren zuzendaritzapean, herri eta deserriaz, emakume sortzaileen egoeraz, migrazioaz, zaintzaz, kolonizazioaz eta arrazismoaz diharduen obran.
Emanaldia hilaren 16ean eskainiko dute, 10 euroko prezioagatik, Donibaneko Juanba Berasategi aretoan. Antzezlana 19:00etan hasiko da eta sarrerak eskuragarri izango dira leihatilan 18:00etatik, baita aurretik ere Bibe plataforman.
Sinopsia
Aurora Mora bere instalazio artistikoari azken ukituak ematen ari da, bere bizitza betirako aldatuko duen deia jasotzen duenean. Posible al da gurea ez den lur batean sustraitzea? Posible, familia eta aberriaren zama gainean dugula, hegaldi propioari ekitea? Eta, gau batean, gure bizitzaren norabidea erabaki beharko bagenu?
Esaera zaharrak dioen bezala: “Atzerrian lurra garratz, hoña ibini egik baratz”.