Gorritik atera da Lezo
COVID-19aren 100.000 biztanleko tasa 361koa da Lezon. Pasaian 400eko mugatik jaistear dira. Oiartzunen eta Errenteria-Oreretan ere, tasa beherantz.
Azken egunetan gutxitzen ari dira, nabarmen, Oarsoaldean COVID-19ak kutsatutakoak. Astelehenetik ostiralera 88 izan dira birusagatik gaixotu diren herritarrak Oarsoaldeko lau herrietan; joan den asteko epe berberean (apirilaren 26tik 29ra) 120 izan ziren. Horrek ekarri du Lezo jada ez dagoela eremu gorrian, 361eko tasara jaitsi da eta. Pasaia ateratzear da, 412ko tasarekin. Oiartzungo eta Errenteria-Oreretako tasak ere asko jaitsi dira.
Horiek horrela, orain ikus beharko da zer nolako neurriak hartzen dituen Eusko Jaurlaritzak igandetik aurrera, behin Espainiako Gobernuak ezarritako alarma egoera bukatzen denean. Arratsaldean da biltzekoa LABIren batzorde politikoa horiek erabakitzeko. Hau da, jakin beharko da eremu gorrian dauden udalerriek zer nolako murriztapenak izango dituzten, baita kanpo daudenek ere. Iñigo Urkullu lehendakariak jakinarazi du epaitegiek baimentzen dituzten araberako neurriak hartuko direla.
- Errenteria-Orereta. Tasa: 530 (609koa zen igandean). Kutsatuak (astelehena-asteartea-asteazkena-osteguna): 10-7-18-15.
- Pasaia. Tasa: 412 (574koa zen igandean). Kutsatuak (astelehena-asteartea-asteazkena-osteguna): 9-4-5-2.
- Oiartzun. Tasa: 646 (819koa zen igandean). Kutsatuak (astelehena-asteartea-asteazkena-osteguna): 1-1-3-3.
- Lezo. Tasa: 361 (592koa zen igandean). Kutsatuak (astelehena-asteartea-asteazkena-osteguna): 4-2-4-0.
