Pasaiako Euskararen lehen Plan Estrategikoa baloratzera deitu dute
2010-2020 epealdirako osatutako plangintzari buruz hausnartu eta datorren hamar urteetako plana garatzen hasteko bilerak egingo dituzte barruti bakoitzean.
Pasaiako Euskararen lehenengo Plan Estrategikoa 2010-2020 epealdirako osatu zen, eta hori dela-eta, datorren irailean hurrengo hamar urteetarako II. Euskararen Plan Estrategikoa egiten hasiko da Pasaiako Euskararen Aholku Batzordea. Horren aurretik, ondorengo asteetan, egunera arte egindakoen gaineko balorazioa egin asmo dute, barrutiz barruti.
Orain hamar urte Pasaiako Euskararen Plan Estrategikoa osatzeko prozesuan parte hartu zuten, eta bertan parte hartu ez bazuten ere, aurreraxeago, plan estrategikotik eratorritako ekintzetan parte hartu izan duten pasaitarrak gonbidatu dituzte plana baloratu eta aurrera begira jartzeko.
Egingo diren bileretan azken hamar urteotan egindakoak azaltzea da asmoa, eta herritarren ekarpenekin I. Euskararen Plan Estrategikoaren balorazioa osatzea, hori izango baita II. plangintzaren abiapuntua. Datozen hamar urteetan Pasaian euskara indartu dadin zer eta nola egin behar den jasoko da plan berrian, besteak beste.
Honakoak dira datozen egunetarako antolatu dituzten bilerak:
- Trintxerpen, hilaren 11n, 18:30ean, Alkateordetzan.
- San Pedron, hilaren 12an, 18:00etan, udal aretoan.
- Antxon, hilaren 18an, 18:30ean, kultur etxean.
- Donibanen, ekainaren 17an, 18:30ean, kulturgunean.
Bertaratu aurretik mezu elektronikoa idaztea eskatu dute.
