Praktika onen seinalitika zabaldu dute Gaztañoko bizilagunek
Errepresiboak, arrazistak, sexistak, homofoboak edo faxistak diren jarrera eta ekintzak ez ditu onartuko Gaztaño auzoak.
GAztaño auzoko sarreretako batean txartela. Argazkia: Gaztañoko Auzo Elkartea Errepresiboak, arrazistak, sexistak, homofoboak edo faxistak diren jarrera eta ekintzak ez ditu onartuko Gaztaño auzoak. Hala adierazi dute bertako bizilagunek, auzoan barrena jarri dituzten txartelen bidez. Praktika eta balio egokiak zabaldu nahi ditu auzoak, eta onartzen ez dituzten jarrerekin batera, ekintza txiki baten bidez atzo zabaldu zituzten seinaleetan jaso egin dituzte onargarriak diren jarrerak. Auzoarekin bat datozenak dira azken horiek, elkartasuna, auzo lana, auzo zaintza, askatasuna eta errespetua.
Atzo arratsaldean zabaldu zituzten seinale-txartel horiek auzo elkarteko kideek. Iniziatiba hori lotuta dago azken urteetan auzoan kuadrilla zehatz eta identifikatu batekin izan den gatazkarekin. Kuadrilla hori ez dela berriro auzoan azaldu esan dute auzo elkarteko ordezkariek, herritar bat auzoan bertan bortizki jipoitu ostean salaketa publikoa egin zutenetik auzotarrek: “Halere, giroa lasaitu bada ere, auzoaren filosofiarekin eta jarduera historikoarekin bat ez datozen jarrerak sumatu ditugu bertara etortzen den jendearen aldetik, maite ez ditugun jarrerak”. Horregatik atzoko ekintza egiteko erabakia, aurrea hartu nahi diote auzoan bizi izan duten egoera errepikatu ez dadin berriro.
Adi daude, eta argi esan dute ez dutela onartuko jarrera ez egokirik, seinaletan aipatu moduan. Bestalde, besoak zabalik hartuko dituzte, beti egin duten moduan Gaztaño auzoak eta bertako bizilagunek auzoarekin bat datozen balioekin bertaratzen direnak.
Beste behin ere, auzoaren alde, Gaztaño bizirik mantentzeko lanean jarraituko duela berretsi du auzo elkarteak, eta horretarako bidea zein den argi dute: auzo zaintza.
