Andonaegi auzoa zaharberritzeko lanak irailean hasiko dira
Jaurlaritzak 8 milioiko diru laguntza emango dio Pasaiako Udalari. Zuzkidura horrekin "berroneratze sozial eta ekonomikoa" lortu nahi dute auzoan.
Andonaegi auzoko etxebizitzak zaharberritu nahi ditu udalak diru-laguntzarekin. 
Pasaiako Udalak izapideak hasi ditu, Eusko Jaurlaritzaren aurrekontuetan hiri-berroneratzeko jardueretarako onartu den 8.000.000 euroko diru-laguntzaren bitartez Andonaegi auzoa berroneratzeko. Planarekin honakoak lortu asmo dituzte:
- Etxebizitzak birgaitzea.
- Auzo mailako zuzkidurak berreraikitzea.
- Berroneratze sozial eta ekonomikoa.
Eusko Jaurlaritzaren aurtengo aurrekontuetan onartutako diru laguntza (8 milioi euro guztira) aurten hasiko da udala jasotzen, honako zatietan: 800.000 euro irailean. 2.200.000 euroko zuzkidura datorren urtean; 2.700.000 euro 2023an; eta 2024an jasoko da gainerako zatia, hau da, 2.300.000 euro.
Bizilagunen obrak eta egin litezkeen urbanizazio-lanak diruz laguntzeaz gain, laguntzaren %15 enplegu eta gizarteratze jarduketetarako erabiliko da.
Irailetik aurrera, diru-laguntzaren lehen zatia jasotzen denean, ekingo zaie lanei Andonaegin. Era berean, eremuko bizilagunei informazioa emateko prozesuak jarriko dira abian. Hori guztia, Eusko Jaurlaritzako Lurralde Plangintza, Etxebizitza eta Garraio Sailarekin elkarlanean.
Andonaegi birgaitzea
Andonaegiko etxebizitzak joan den mendeko 50eko hamarkadakoak dira, eta arrantza- eta portu-jardueraren garapenaren ondorioz sortu zen etxebizitza eskuragarrien beharra asetzeko eraiki ziren.
Gaur egun, auzoko gizarte-profilaren bereizgarri da “adineko biztanleria zahartu egin dela etxebizitzarekin”, udal arduradunek azaldu dutenez. Zehazki, honako arazo hauek zehaztu dituzte: irisgarritasun eta energia-eraginkortasun arazoak, eta narriadura orokorra, bai auzoetan eta bai eraikinetan.
Hedapen posiblea
Planak, geroagoko fase batean, bere jarduera-eremua Arrantzaleen Auzora eta Salinasera hedatzea aurreikusten du, betiere aurrekontu-baliabideen baitan; horrela, Andonaegi, Arrantzaleen Auzoa eta Salinas bizitegi-eremu hiritarrak berroneratzeko, birgaitzeko eta kudeatzeko Plana, Udalak egina, gauzatuko litzateke.
