Euskadiko Txapelketarako prest daude Pasaia Kayakeko haurrak
Euskadiko Txapelketa da haurren kategoriak denboraldi honetan Euskadin jokatzeko izango duen proba bakarra. "Ilusioz eta itxaropentsu" daude.
Gaizka Lopez, Banyolesen jokatutako Espainiako Txapelketan, irteteko prest. 
Pasaia Kayak Legution (Araba) izango den Euskadiko Txapelketan izango da igandean. Klubeko arduradunek adierazi dute “ilusio handiz eta itxaropentsu” daudela haurren kategoriako neska-mutil guztiak, aspaldiko partez Euskal Herrian lehiaketa bat egiteko aukera izango baitute, murrizketak murrizketa.
Euskadiko Txapelketa da haurren kategoriak denboraldi honetan Euskadin jokatzeko izango duen proba bakarra. Apirilean jokatutako Espainiako Txapelketa kontuan izanda, klub pasaitarrak adierazi du Gaizka Lopez mutilen B kategorian (2008an jaiotakoa) eta Enara Nuñez nesken A kategoria (2007an jaiotakoa) izan daitezkeela talde aukera nagusiak goiko postuetatik hurbil ibiltzeko.
Dena den, hautagai gehiago ere aipatu dituzte pasaitarrek joko horretan sartzeko, batez ere A kategoriako nesken kasuan, Espainiako Txapelketa gogorrean txukun aritu baitziren oro har, Noa Revuelta, Irati Herce zein Kattalin Altuna.
Euskadikoa ere lehia estua izango da, euskal talde onenek –Irungo Santiagotarrak taldea buru– talde indartsuak izango baitituzte Legution, baina Pasaia Kayak gogotsu dago: “Hobeto prestatu ahal izan dugu lehiaketa hau eta konfiantza osoz ekingo diogu erronkari”.
3.000 metroko distantzian jokatuko dira probak, eta kategoria bakoitza bereiz jokatu da, 2007. urtea jaiotakoak txanda batean eta 2008. urtean jaiotakok bestean, nesken kasuan zein mutilenean.
