Euskalgintza herrigintza bihurtzeko bidaia prest du Lau Haizetarak
‘Aukerak sortzen’ parte hartze prozesua amaituta, horren ondorioak sozializatu ditu Lau Haizetara Euskaltzaleon Topaguneak. Herrigintzara jauzi egingo dute, euskara helburu beharrean, zehar lerro bihurtuta.
Lau HAizetara Euskaltzaleon Topagunearen talde eragile berria. Aukerak sortzen parte hartze prozesua amaituta, ondorioak aurkezteko saioa egin zuen Lau Haizetara Euskaltzaleon Topaguneak joan den astean. Pozik azaldu dira, ase, emaitzarekin. Hala azaldu dute elkarteko kide diren Mikel Azkaratek eta Txuss Alfonsok. Orain, hausnarketa prozesuak eman duena mamitzeko eta egi bihurtzeko garaia heldu da, eta gogoz hartu dute erronka: hausnarketa bideratzea, euskal hiztunen antolaketa eredu berri bat eta Lau Haizetara berrasmatzea dira helburuak.
Parte hartze prozesua bera erronka handia izan dela azaldu du Alfonsok: «Pandemia betean egin dugu, eta hala ere, 74 lagunek hartu dute parte osasun eta segurtasun neurriak zorrotz beteta». Balioan jarri duten ezaugarri bat, testuinguru zailean ere, elkartearen jarduna ez dela eten izan da, «aurrera egiteko beharra eta gogoa sentitu dugu». Parte hartze prozesua arrakastatsua pandemia gorabehera, eta emaitza aberatsa.
Izan ere, etorkizuneko lan ildoak zein elkartearen izaera eta antolamendua zehaztu dituzte. «Pertsona aldaketa, antolamendu aldaketa eta ideia berriak. Herrigintzan bisioa duten pertsonak gakoa dira, baita emakumeen presentzia areagotzea ere». Gazteak dira beste erronka bat; ez dute elkartera hurbiltzea lortu, eta hori zehaztu duten beste egin beharreko bat izan da, gazteengana heltzea elkartearen parte izan daitezen.
Zaintza eta elikadura
Euskalgintzatik herrigintzara jauzi horretan bi ideia klabe aipatu dituzte Azkaratek eta Alfonsok: zaintza eta elikadura. Lehenengoan, odola emateko iniziatibak jende ugari batu du adibidez. Orain, Elkarrekin ikasiz egitasmoa jarri dute martxan. Boluntarioen bidez errefortzu eskolak eskaintzen dizkiete Errenteria-Oreretako ikasleei. Zaintzarekin lotuta, elikagaien bilketa egiten dute Zaporeak Elkarteari emateko, edota Kaskarotenea Ziburuko ikastolarentzat urtero kanpaina antolatzen du elkarteak. Elikadurarekin lotuta, berriz, urteak daramate Errigorarekin elkarlanean, eta baratzea nahiz Herrerako sukaldea sustatzen ari dira topagunetik.
Asmo berrien artean, hizkuntza harrera zerbitzua dute erronketako bat. Hizkuntza aholkularitza egiteko batetik, eta hizkuntz aniztasunaren ildotik herrira heldu berri diren familiekin hartu- emana izateko. Bestetik, berrikuntza gune bat da bigarren lan ildo berria, «aktibazio sozialean herriko beste eragileekin hausnarketa egiteko».
Martxan dituzten programetatik lauk berritasunak izango dituzte: Mintzalagunak, Kuadrillategik, Familian Jolasean-ek eta Euskaraldiak. Eraldaketa digitala da elkartearen beste erronketako bat etorkizun hurbilera begira.
Parte hartze prozesutik sortutako erronken bideari egiteko ezinbestekoa izan da aurretik lanean ari zen taldearen eta egungoaren borondateen batura, «ahalbidetzeko eta berritzeko borondateen ondorioa da trantsizio hau». Aitortza ere jaso du topaguneak euskalgintzatik herrigintzara egiten ari den bideagatik: eredu bihurtu da beste euskara elkarte batzuentzako.
