Lonjako obrei buruzko galderak egin ditu EH Bilduk Eusko Legebiltzarrean
2011n hasitako lanen egoera argitzeko asmoz, EH Bilduk Batzar Nagusietan eta Jaurlaritzan azalpenak eskatu ditu. "Zer finantziaziorekin egin zaie aurre gainkostuei?".
Lonjako proiektuaren irudia. 
EH Bilduren legebiltzarreko taldeak San Pedroko Lonjaren inguruko hainbat galdera egin ditu Jaurlaritzan, obra eta horren ingurukoak zein egoeratan dauden ezagutzeko eta agintariei kontuak argi ditzaten eskatzeko.
Hamar urte igaro dira obra hasi zenetik eta bilkideek gogora ekarri dute duela 5-6 urte egon behar zuela Lonjak amaituta. Gainera, azken hilabeteetan bolo-bolo ibili den inkognita bat mahaigaineratu dute: “Azken albisteen arabera obra ez da bere osotasunean amaituko eta ez dago sikiera amaiera datarik”.
Aipatutakoagatik, EH Bilduk Batzar Nagusietan eta Jaurlaritzan azalpenak eskatzea erabaki du, “nahikoa da, pasaitarrok ez dugu kudeaketa hau merezi!”. Honakoak dira:
- Zein momentutan dago Pasaiako arrain-lonjaren obra? Zenbat diru inbertitu da dagoeneko lonjaren obran eta haren inguruan orain arte (kapituluka sailkatuta)? Obraren zein ehuneko eta atal egin dira eta zeintzuk falta dira obra guztiz amaitzeko? Falta diren fase edo atalen zerrenda nahi genuke, atal horiek behar duten aurrekontuarekin eta haiek egikaritzea noren ardura den zehaztuz.
- Zein izan da Jaurlaritzaren parte-hartzea lonjaren obran? Zertan gauzatu da parte-hartze hori? Hitzarmenik edo diru-laguntzarik balego, horren kopia nahi genuke.
- Falta diren fase edo obretan aurreikusten da Jaurlaritzaren parte-hartzerik? Zein inbertsio aurreikusten dira?
- Zer ekimen gauzatuko ditu Jaurlaritzak obra lehenbailehen amai dadin? Eta Portuko Lehendakariak?
- Beste eragile edo instituzioek zenbat diru jarri dute lonjaren obran? Zertan erabili da diru hori?
- Obraren atzerapenekin lotuta (gutxienez 6 urte) zergatik gelditu da obra horrenbeste alditan? Zein izan da geldialdi bakoitzaren zergatia edo justifikazioa? Nola konpondu dira arazo horiek? Zein finantziaziorekin?
- Zenbatekoak izan dira obraren gainkostuak, hasierako proiektu-lizitazioarekin alderatuta? Zergatik izan dira gainkostu horiek? Zer finantziaziorekin egin zaie aurre gainkostuei?
- Nola dago obraren judizializazioa? Zer ondorio ekarri ditu judizializazio horrek (ekonomikoak eta epeei dagokienean)?
Aurrekariak
Pasaiako Lonjaren obrak 2010ean hasi behar zuen, baina, lizitazio prozesuan izandako irregulartasun batzuen harira 2011ko abuztuan hasi zen azkenean. Hasiera batean 15 milioi euroko kostua zuen obrak, baina azken albisteek 26 milioi euro inguru kostatuko duela diote. Lanak gelditu izanaren arrazoia gainkostu horretan jarri dute bilkideek: “Alarma guztiak piztu zituzten eta horren ondorioz obra judizializatu eta paralizatu zen 2016.urtean”.
EH Bilduk nabarmendu du obra hura diru publikoarekin ordaintzen ari dela, eta bai Gipuzkoako Foru Aldundiak baita Eusko Jaurlaritzak ere dirua jarri dutela bertan. Jaurlaritzak, zehazki, 3 milioi euro jarriko zituela agindu zuen obraren hasieran, eta aldundiak Lonjaren gainaldean dagoen terraza urbanizatuko zuela agindu zien pasaitarrei, horretarako udalarekin hitzartutako 5 milioi euro jarriz.
