Pasaiako bozeramaileek LGTBIQ+ kolektiboari konpromisoa agindu diote
Homofobia, Lesbofobia, Transfobia eta Bifobiaren kontrako Nazioarteko Egunarekin bat eginez, bozeramaileen batzordeak adierazpen bateratu bat osatu du.
Pasaiako bozeramaile batzordeak adierazpen bateratu bat argitaratu du, maiatzaren 17a -gaur- Homofobia, Lesbofobia, Transfobia eta Bifobiaren kontrako Nazioarteko Eguna baita. Honakoak dira, hitzez hitz, hartu dituzten ideia eta konpromisoak:
Maiatzaren 17a Homofobia, Lesbofobia, Transfobia eta Bifobiaren kontrako Nazioarteko Eguna da, egun horretan 1990. urtean ezabatu zuelako Osasunerako Mundu Erakundeak homosexualitatea buruko gaixotasunen zerrendatik.
Pasaiako Udalak bat egiten du gaurko eguneko aldarriekin eta konpromisoa adierazten du jendarte adeitsu, justu eta integratzaileago bat eraikitzeko lanean jarraituko duela.
Hori dela eta, Pasaiako Udalak bat egiten du Eusko Jaurlaritzako Berdindu zerbitzuak egin duen manifestuarekin.
Hauek dira ideia nagusiak:
- COVID-19aren ondorioz bizi dugun egoera eragin handia izaten ari da gure kolektiboan ere; beraz, sexu- eta genero-aniztasunaren aurkako gorrotoak eragindako erasoak salatzen jarraituko dugu.
- Lesbiana, gay eta bisexualen lege-babesean aurrerapen handiak egin diren arren, NBEko 69 estatu kidek sexu bereko helduen artean adostutako sexu-ekintzak zigortzen jarraitzen dute.
- Gaur egun, oraindik ere beharrezkoa da gure gizartean oraindik indarrean dauden diskriminazioen aurkako borroka sendotzea. Gizarte osoaren erantzukizuna, diskriminazio- eta indarkeria-mota guztien aurka borrokatzeko.
- Berdintasunerako eskubidearen eta sexu-orientazio eta generoagatiko diskriminaziorik ezaren alde lan egiten jarraituko dugu, aniztasunaren bizipen askea sustatzeko helburuarekin.
Bestalde, Udalak konpromiso zehatz hauek hartzen ditu:
-
Herritarrek beren eskaerak egiteko bete behar dituzten instantzietan, legeak baimentzen duen neurrian, ez zaie herritarrei eskatuko emakume-gizon dikotomia horretan beren burua definitzeko.
-
Udalarenak diren eraikin orotan komun komunak ezartzen jarraituko dugu, genero-bereizketarik gabe.
-
Generoagatiko edo sexu-orientazioagatiko eraso orori erantzun instituzionala emango zaio, eta erantzun hori eragindako kolektiboekin batera landuko da.
-
Udalak udalerriko ikastetxeetan kontzientziazioa, ikusgarritasuna eta sentsibilizazioa lantzen jarraituko du.
