2.000 kilo hondakin plastiko jaso ditu Materrek Gipuzkoako arro nagusietan
Plastifisharen Kosterak agur esan du. Urtebeteko emaitza: 46 zabor bilketa, 2.000 kilo hondakin plastiko, 112 proiektu, 4 ekopatruila eta sentsibilizazioa.
Atzo egin zuten Donostiako Kursaalean proiektuaren aintzateste ekitaldia. 
Atzo egin zuten Donostiako Kursaalean Plastifisharen Kostera 2019-2020 proiektuaren amaiera ekitaldia. Denbora horretan 1.800 kilogramo hondakin plastiko jaso ditu Materrek, (beste 40 bat eragilerekin kolaborazioan) Gipuzkoako sei arro nagusietan (Bidasoa, Oiartzun, Urumea, Oria, Urola eta Deba).
Bi mila pertsona baino gehiagok parte hartu dute proiektuan, itsas eragileen, herritarren eta ikastetxeen artean. Gauzatu diren ekintza ugarien artean, nabarmentzekoa da 46 zabor bilketa egin direla eta, horien ondorioz, ia 2.000 kilo itsas zabor jaso direla.
Era berean, sentsibilizazio ekintzak antolatu dira itsas eragileekin, arazo horren inguruan kontzientziatzeko eta prebentzioan eragiteko. Nabarmentzekoa da, halaber, herritarren 4 ekopatruila sortu direla itsas zaborra murrizteko eta arazo hori zabaltzeko lan egiteko.
Plastifisharen Kostera herritarrak sentsibilizatzeko eta prestatzeko ekimen bat da, Ingurumen Departamentuak, Ternua enpresak eta Mater Ontzi Museo Ekoaktiboak bultzatutakoa. Horren helburua da prestakuntzako, sentsibilizazioko eta hondakinak biltzeko hainbat jarduera egitea, herritarrak itsas zaborren erronkaren aurrean inplika daitezen lortzeko.
Ternuako kamisetarako Plastifish lehiaketa
Proiektu hori dela eta, Plastifish lehiaketa bat ere egin da Gipuzkoako ikasleen artean. Zehazki, ikastetxeentzako proposamena zen ikasleek arrain bat diseinatzea, garbiketa kanpainetan bildutako plastikoa erabiliz. Bozketa bidez, plastifish bat aukeratu da aurkeztu diren 170 proposamenen baino gehiagoren artean.
Hautatutako elementua Ternuak 2022ko udaberri-uda bilduman sartuko du, eta, gainera, Seacycle ehunez egindako (PET plastikoa itsasoko plastikoarekin nahastuta egindako haria) kamiseta batean jarriko dute. Lehiaketaren irabazlea Orereta Ikastolako Naia Aranberri izan da.
