Adierazpen bateratua egin du udalak Kultur Aniztasunaren Egunaren harira
Kultur aniztasuna da Errenteria-Oreretaren ezaugarrietako bat. Hamaika kultura eta hizkuntza elkarrekin bizi dira, eta aniztasun horrek, zinez bizia egiten du udalerria.
Errenterian 11 kolore jardunaldien aurkezpena Hibaikaren egoitzan. Kultur aniztasuna da Errenteria-Oreretaren ezaugarrietako bat. Hamaika kultura eta hizkuntza elkarrekin bizi dira, eta aniztasun horrek, zinez bizia egiten du udalerria. Aberastasun horren jakitun, adierazpen instituzional bateratua egin du Errenteriako Udalak, aho batez, Kultur Aniztasunaren Nazioarteko Egunaren harira.
Saiakera berezia egin du udalak azken urteotan elkar topo egiteko eta elkarrekintzarako espazioak sortzen, adierazpenean nabarmendu duen moduan: ezberdinen arteko ezagutza sustatzen dutenak, jakin-mina sorrarazten dutenak, edota norberaren bestelakotasun bat garatzen eta ikusarazten dutenak. Aurtengo Aniztasunaren Nazioarteko Eguna baliatu nahi izan du udalak orain arteko bidean sakontzen jarraituko duela azaltzeko, eta Errenteria-Oreretan bizirik dirauten hezkuntza eta kultura guztiak eta horien eramaile direnekiko aitortza egiteko: “Errenteria guztiontzat bizileku kohesionatuagoa izan dadin, herrikideen bizi baldintza duinak eta eskubide sozial eta politikoak errespetatzea bermatu behar dugu, bizikidetza linguistiko eta kulturala helburu”.
Datozen urteetan munduko kultura hizkuntza guztietan arnasten diren balio unibertsalak ezagutzea eta konpartitzea beharrezkoa den moduan, elkarrekiko babesa eta zaintza erdigunean dagokiola herri gisara ere esan du udalak, “soilik honela egingo baitugu komunitate kohesionatu, bizi eta indartu baterako bidea”. Errenteriako Udalak norabide horretan jorratuko dituela kulturaniztasunari dagozkion politika publikoak erantsi du.
Hainbat konpromiso hartu ditu, halaber. Bizikidetza linguistiko eta kulturalaren bidean eragile ezberdinekin lanketa bateratuak egiteko konpromisoa da horietako bat. Herritarrei begira, gainera, jatorria eta kultura dena dela ere, eskubide eta aukera guztien jabe izan dadin herritar oro lanean jarraitzeko konpromisoa hartu du. Kulturen artean sinergiak sorraraziz kultura ezberdinen arteko topaguneak sortzen jarraitzea beste neurrietako bat, hezkuntzarekin lotuta, gazteengan eragiteko eta kulturaniztasunarekiko errespetuan hezteko konpromisoarekin batera. Udalerriko hizkuntza aniztasuna balorean jartzea beste gakoetako bat udalak huts egingo ez diona, eta konpromisoa halaber, aniztasun horren mapa osatzekoa. Azkenik, Errenteriaren aniztasun kultural eta linguitikoa bistaratzeko ekimenak antolatzen jarraitzea aipatu du.
Errenteriako Udalaren adierazpen instituzionala
