Udako Oporrak programan izena eman daiteke oraindik
Hainbat talde osatu gabe daude eta plaza hutsak daude oraindik, eta astelehenetik hilaren 30era bitartean izango da izena emateko epe berria.
Udako oporrak
Errenteriako Udalak, Udako Oporrak programan izena emateko epe berria zabalduko du astelehenetik aurrera, familia guztiek parte hartzeko aukera izan dezaten. Hainbat talde osatu gabe daude eta plaza hutsak daude oraindik, eta astelehenetik hilaren 30era bitartean izango da izena emateko epe berria.
Online egin daitezke gazteriaren web orriaren bidez, edo Zu! Zure Udala zerbitzuaren bidez, azken kasu horretan kontuan hartu behar da 28a (ostirala) izango dela izena emateko azken eguna. Ordutegia astelehenetan 07:30etik 14:00etara da, astearte eta ostegunetan 07:30etik 19:00etara eta asteazken eta ostiraletan 07:30etik 15:00etara. Ezinbestekoa da hitzordua eskatzea eta pertsona bakarra sartu ahalko da.
Plaza libreei dagokienean Txikiak programaren barruan (2015-2017), 168 plaza daude libre orotara lau txanda ezberdinetan. Lehenengo txandan, ekainaren 24tik 30era, 31 plaza daude; uztailaren 1etik 7ra, 30 plaza; utzailaren 8tik 14ra, 43 plaza; eta uztailaren 15etik 21era, 54 plaza.
Udalekuak programan, 2001 eta 2014 urte artean jaiotakoei begira, 106 plaza daude libre guztira: ekainaren 24tik 30era, 20 plaza daude; uztailaren 1etik 7ra, 3 plaza; utzailaren 8tik 14ra, 28 plaza; eta uztailaren 15etik 21era, 55 plaza.
Errenteabentura, 2008 eta 2010 urte bitartean jaiotako haurrei begirako programan eta Beireko kanpamenduan (2005-2007) gazteriaren web orrian jakinaraziko da astelehenean zenbat plaza dauden libre eta izena emateko jarraitu beharreko tramitea.
Ezingo dute izena eman aurretik dagoeneko beste talde batean aritzeko izena eman dutenek. Hutsik dagoen gune eta txanda aukeratzerakoan gainera, ordaindu egin beharko da unean, eta ez da dirurik itzuliko baja ematen bada, ez bada ezinbesteko egoera ematen dela beti ere justifikazioarekin. Izena emandako hurrenkeraren arabera erreserbatuko da plaza, baina gutxienez hiruko taldeak behar direnez, posible da talde batzuk ez osatzea. Kasu horretan aukera emango da beste talde batean parte hartzeko, eta ez badaude ados, dirua itzuliko zaie.
500 haurretik gora eman dute izena dagoeneko Udako Oporrak programan, eta udalak, eskerrak eman dizkio jardueran konfiantza erakutsi duten familiei.
Informazio gehiagorako posta elektronikoz idatzi edo 943 44 96 06 telefono zenbakira deitu daiteke.
