Autokontsumo kolektiboko instalazio fotovoltaikoa izango du Bizarain Ikastolak
Udalak azaldu duenez, urrats garrantzitsua da honakoa, baita konpromiso sendoa ere klima aldaketaren aurkako borrokan eta ingurumenaren babesean.
Bizarain Ikastolaren eraikina. Plaka fotovolkaikoak jarriko ditu udalak Bizarain Ikastolan. Autokontsumorako instalazioa eraikinaren estalkian kokatuko da eta 87,2 Kwp-eko potentzia instalatua izango du. Urtean 90.671 KWh ekoiztu eta udalak faktura elektrikoan 8.918 euro aurreztuko ditu. Instalazioak izan dezaken 30 urteko bizitza erabilgarrian 295.159 euro aurreztea dakar. Gainera, ingurumenari eta klima aldaketaren kontrako borrokarentzat lagungarri izango da instalazioa, atmosferara C02 gutxiago isurtzea ekarriko du eta. 72.858,4 euroko inbertsioa egin du udalak proiektu horretan.
Bereizgarritasunik handiena autokontsumo kolektiboko instalazioa izango dela da. Hau da, eraikin horretan sortzen den energia Beraungo Bizarain eraikinetik 500 metroko erradioan dauden beste ekipamendu eta udal eraikin batzuetan erabili ahal izango da: Mikel Odriozola estadioa, Pio Baroja eraikina, Gamon Txiki, El Parqueko erretiratuen egoitza, Beraungo erretiratuen egoitza, Pablo Sorozabal garajeak, Beraungo frontoia, Bizarain Ikastola…
Gaur egun Niessen eraikinak autokontsumo kolektiboko instalazio fotovoltaiko bat du, eta udaletxea, Galtzarabordako Kiroldegia, Niessen eta Errenteria Musikalek hartzen dute parte.
“Urrats garrantzitsua da honakoa, baita konpromiso sendoa ere klima aldaketaren aurkako borrokan eta ingurumenaren babesean”, esan du udalak.
