Bakardadeari aurre egiteko Hariak
Hariak estrategiaren bidez, aukeratutakoa ez den bakardadeari aurre egin nahi diote aldundiak eta Adinberrik.
Hariak estrategiaren atzoko saioko une bat. Argazkia: Gipuzkoako Foru Aldundia Hariak estrategia azken fasean sartu da. Helburua, aukeratutakoa ez den bakardadeari aurre egitea da, eta azto hasi zuten ekarpenak biltzeko parte hartze prozesua. Gipuzkoako Foru Aldundiak eta Adinberrik gidatutako bide orriarekin, bakardade mota ezberdinen fenomeno zabalari buruzko hainbat esperientzia, ezagutza eta iritzi bildu nahi dituzte.
Bide horretan, Errenteria-Orereta izan dute abiapuntu. Oarsoaldeko lau udaletako ordezkariek bat egin zuten atzo. Tokiko eragileekin, hainbat kolektibo sozialetako ordezkariekin, eta hirugarren sektoreko entitateekin bigarren saio bat egingo dute. Bakardade egoerei aurre a hartu eta gainditzea du misio Hariak estrategiak, eta horretarako gizarte harremanak sendotzeko bakardadeei buruzko elkarrizketa publikoa sortu nahi dute.
Maite Peña Gizarte Politiketako diputatuak Gipuzkoan 55 urtetik gorako pertsonen %5,5 bakarrik sentitzen dela, baina zeharkako bakardadea edo bakardade probatua %29,5ekoa dela gogorarazi zuen atzoko saioan. Bakardadeei aurre egitea erronka sozial eta kolektiboa dela nabarmendu zuen Peñak, “izan ere, gai pertsonala izan arren, eragin handia du gizartean, eta estrategia globala eta partekatua behar du”.
Estrategiaren lehen zirriborroan, lau lan ibilbide eta 12 esku hartze mota jaso dira, “sare gero eta indartsuagoa eraiki nahi dugu”.
Lehen saioa atzo egin zuten Errenteria-Oreretan eta uztailaren 15era arte, saio bikoitzak egingo dituzte Gipuzkoako eskualde guztietan.
Parte hartze prozesua amaituta, Hariak estrategiaren idazketa fasea bukatuko da eta aurkezpena egingo dute lurralde osoan aplikatzeko, “zaintza arloan sakontzen jarraitzeaz gain, belaunaldi arteko harremanak sendotzeko ahalegina egingo da; berrikuntzaren eta esperimentazioaren ikuspuntutik”.
