Adierazpen bateratua egin du udalak Ategorrietako sarraskiaren karietara
Aho batez onartu dute Pasaian ordezkaritza duten lau alderdiek testua. 90 urte beteko dira hil honetan Guardia Zibilak zazpi arrantzale hil zituenetik.
Bihar 90 urte beteko dira Ategorrietako sarraskian Guardia Zibilak zazpi arrantzale tiroz hil zituenetik. Gertatutakoa oroitzeko adierazpen bateratua onartu dute Pasaiako udalbatzan ordezkaritza duten lau alderdiek, aho batez. Honakoa da, hitzez hitz:
1931ko maiatzean, Espainiako II. Errepublika aldarrikatu ondoren, Kantauri isurialdeko portu nagusietan greba-egun batzuk bizi izan ziren itsasoko langileen lan-errebindikazioei irtenbidea emateko. Hauek ziren eskakizunak: soldata hobeak Gran Soleko marinelentzat, itsasoan arrantzatzen zuten igandeetan, haien trukean atsedenaldi baliokidea, eta lanaldia gehienez 15 ordukoa izan zedila.
Maiatzaren 26an, San Pedro eta Trintxerpe inguruetan bildu zen jendea manifestazioan atera zen Donostiara, baina Probintziako Gobernadoreak agindutako ordenako indarrak hedatu zirela egiaztatu zutenean, ez zuten aurrera jarraitu. Gau horretan bertan “Avance Marino” sindikatuko hainbat zuzendari atxilotu zituzten, baita Langile Elkarteen Federazioko burua ere.
Maiatzaren 27an, goizeko hamarrak aldera, 2.000 lagunetik gorako manifestazioa abiatu zen Trintxerpetik Donostiara. Manifestazio horren bidez, salatu nahi zen patronalarekin akordiorik ez zegoela, eta Donostiako biztanleek jakin zezatela zer borroka egiten ari ziren Pasaiako arrantzaleak eta marinelak sektorearen erreklamazioen alde.
Mirakruz gainera iristean, Armadako destakamendu batekin topo egin zuten, eta gobernadoreari jakinarazi zieten baketsuki atxilotutako kideak aske uzteko eskatzera zihoazela. Horiek pasatzen utzi zieten eta aurrerago Guardia Zibila zegoela ohartarazi zieten. Behin Ategorrietako erlojuaren parera iritsita, manifestazioari aurrera egiten ez uzteko aginduarekin, Guardia Zibila tiro egiten hasi zen manifestarien aurka.
Zorigaiztoko topaketa hartan 7 pertsona hil ziren: Josee Carnees (32 urte), Manuel Peerez (34), Jose Novo (25), Antonio Barro (31), Julian Zurro (19), Jesus Camprosola (23) eta Manuel Lopez, eta asko zaurituak gertatu ziren.
Hala, gertakari horien 90. urteurrena dela eta, Pasaiako Udaleko Bozeramaileen Batzordeak honako hau adierazten du:
1- Oroitzapena eta aitorpena Ategorrietan eraildako 7 manifestari pasaitarrei, haien familiei eta 1931ko maiatzaren 27ko manifestazioan zauritutako guztiei.
2- Botere publikook, egiaren, justiziaren eta erreparazioaren printzipioei jarraikiz, memoria historiko objektibo bat defendatu eta balioetsi behar dugu, eskubideen eta askatasunen defentsan borrokatu ziren eta hori egiteagatik ondorio pertsonalak jasan zituzten pertsona guztientzako aitorpena sozialki partekatuz, kasu honetan bezala, gizarte berdinago eta bidezkoago bat defendatzeagatik.
3.- 1931ko maiatzaren 27an izandako gertaeretan hildakoen memoria ohoratu eta gogoratzeko asmoa adierazten du, Donostiako Udalarekin adosten diren ekitaldi instituzionaletan parte hartuz, gertakari horiek ezagutuak izan daitezen eta ez daitezen ahanztura kolektiboan erori.
