Merkataritza, ostalaritza eta zerbitzuak suspertzeko plana martxan da
Pasaiako udalbatzak, EH Bilduren abstentzioarekin, udalerriko hiru sektoreak suspertzeko iniziatiba abian jartzea erabaki du.
EH Bilduk bi arrazoi eman ditu abstentzioa azaltzeko. 
Pasaiako udalbatzak, PSE-EE, EAJ eta Podemosen aldeko botoa eta EH Bilduren abstentzioarekin, Pasaiako Merkataritza, Ostalaritza eta Zerbitzuak Suspertzeko Plana onartu du.
Abstentzioaren arrazoiak azaldu zituen atzo oposizioko taldeak: “Azkuene eta Eskalantegi kaleen inguruko hainbat kontu ez direlako txertatu planean, eta planak hainbat ekarpen egiten dituelako iradokizun gisa interesgarriak izan liratekeenak, baina beste ekarpen batzuk proposamen gisa jaso dira, adibidez, Zirizaren gestioari dagokiona”.
Pasaiako Udalak 2020ko otsailean udalerriko Merkataritza, Ostalaritza eta Zerbitzuak Suspertzeko Plan bat prestatzeko lan teknikoak abiatu zituen zerbitzuen sektorea indartu eta tresna berriak emateko kontsumitzaileen eskakizun berriei erantzun ahal izateko; horrek guztiak pasaitarren ekonomian, enpleguan eta bizi-kalitatean eragiteko helburuz.
Planak Ikertalde aholkularitzaren laguntza teknikoa izango du, ikerketaren lan teknikoak gauzatzeaz arduratuko dena. Emaitzak ekintza-lerro zehatzetan gauzatuko dira, datozen urteetan sektorearen arlo urbanistiko eta lehiakorrean garatzen joango direnak. Ekintza Plan horrek, azken batean, udalerriko merkataritza, ostalaritza eta zerbitzuen eskaintza eta gunea hobetzen eta modernizatzen lagunduko duela adierazi dute udal arduradunek.
Plan hori Eusko Jaurlaritzako Turismo, Merkataritza eta Kontsumo Sailak sustatu eta babestu du, eta Laurak Bat herriko Merkatarien Elkartearen eta ostalaritza- sektorearen laguntza aktiboa izango du.
