Andonaegiko guardaren etxea bulego bihurtuko dute lanek iraun bitartean
Auzoaren berroneratzeri ekiteko bulego berri bat gaituko du udalak. Obrak egitea hautatzen duten bizilagunek finantziazioaren zati bat jarri beharko dute.
Trintxerpeko Andonaegi auzoa zaharberritzeko aurreikusitako lanak monitorizatzeko bulego bat gaituko du udalak Andonaegi Jauregiko guardaren etxean. Gune hori behar berrietara egokitzeko proiektu bat lizitatu dute, eta aste honetan bertan entregatuko diote dokumentua udalari; behin hori eginda, bulegoko obren lizitazioari “berehala” ekingo zaiola ziurtatu du Izaskun Gomez alkateak.
Hil erdialdean jakinarazi zuen udalak auzoa berroneratzeko plana martxan jarriko zela irailean, 8 milioi euroko aurrekontuarekin. Gomez alkateak argitu nahi izan du udalak ez duela bizilagunik behartuko euren etxebizitzetan lanik egitera, baizik eta norberaren hautua izango dela finantziazio hori baliatzea, edo ez. Obrak egiteko erabakia hartzen duten trintxerpetarrek finantziazioaren zati bat euren poltsikotik jarri beharko dute, eta administrazioak beste bat.
Alkateak argi utzi du adierazitako aurrekontua “behar handiena” duten jarduketei zuzenduko zaiela nagusiki; horien artean aipatu ditu, besteak beste, irisgarritasuna hobetzeko lanak, eraginkortasun energetikoa, edota suteen aurkako segurtasuna bermatzeko sistemak. Nabarmendu du hautua norberarena izango dela: “Udalak ez du inor behartuko ezertara. Diru hori zaharberritzeko jarduketei zuzenduta dago, baina interesik ez balego, finantziazioa beste esparru batera eramango litzateke”.
Andonaegi auzoaren berritzea ekintza plan zabalago baten parte dela azaldu du udalburuak, izan ere, Andonaegi, Poblado eta Salinas guneak zaharberritzeko proiektuak ia 25 milioiko aurrekontua baitu, eta udal arduradunak baietsi du finantziazio gehiago lortzeko lanean jarraituko dutela, posible balitz, baita Europako funtsetara joaz ere.
