COVID Iraunkorra plataformako hiru herrikideekin bildu da Aizpea Otaegi
Bizi duten egoera gertutik ezagutzea izan da helburua eta ikusarazteko laguntza eskatzea.
Covid iraunkorra elkartearekin bilera egin du alkateak. Begoña, Amaia eta Idoia Euskal Herriko Covid Iraunkorra LongCovid Euskal Herria elkarteko kide dira. Hirurak dira errenteriarrak eta Aizpea Otaegirekin bildu ziren joan den astean. Koronabirusa gainditu ondoren bizpahiru hilabetera oraindik ere sintomak ditzuten gaixoei Covid Iraunkorra dutela esaten zaie. Estimazioen arabera koronabirusarekin kutsatutakoen %10ek sintomak izaten jarraitzen dute 12 aste igaro ondoren. Askotariko sintomatologia dute, baina eragin bateratu bat: egunerokoari aurre egiteko zailtasunak.
Jasotzen duten arreta ez dela homogeneoa ezta holistikoa ere diote, kasu batzuetan askotariko probak eta mediku segimendu jarraitua izaten ari diren bitartean, beste batzuetan asko ari zaie kostatzen medikuek euren gaixotasuna aintzat har dezaten. Informazio nahikorik ez dagoela Osakidetzako lehen arretako medikuen artean uste dute kaltetuek.
Bizi duten egoeraren aurrean eskaera zehatzak egiten ari dira plataformatik. Hala Covid Iraunkorra duten pertsonen zenbaketa egitea galdegin dute, baita euren diagnostiko klinikoak eta arretak lehentasuna izatea ere. Protokolo bateratu baten beharra ere nabarmendu dute, eta hori lortze aldera lan egitea eskatu dute. Beste eskaera bat euren egoerarekin lotuta, lehen arretan unitate espezifikoa sortzea da gaixotasun hori artatzeko, “Nafarroan, Katalunian, edota Andaluzian egin duten moduan”.
Alkateari bestalde, osasun erakundeei plataformaren eskaera horiek egiten laguntzeko eskatu diote hiru ordezkariek, baita gaixotasuna ikusarazten laguntzeko ere. Horren harira, Otaegik datozen egunetan bidaliko die eskaera horiek jasotzen dituen gutuna osasun agintariei. Haiekin harremanetan jarraitzeko konpromisoa azaldu die, halaber lakateak lankidetzan jardunez, bizi duten ulertezintasuna eta laguntza falta gainditzeko.
Covid Iraunkorra izan dezaketela pentsatzen dutenei, berriz, deia egin diete harremanetan jartzeko elkartearen posta elektronikoaren bidez.
