Hasi du bidea Lekuonak
Txaloka hartu dute Lekuona Fabrikako langile eta arduradunek gaur 09:00etan sartu den lehen erabiltzailea.
Lekuona Fabrikaren lehen erabiltzailea sartzeko unea. Ikastera zihoan gaztea izan da. Bederatziak puntuan zabaldu ditu ateak Lekuona Fabrikak eta bertan arituko diren udal langile eta arduradunetako batzuk, txaloka hartu dute lehen erabiltzailea. Ikastera bertaratu da, eta harrituta jaso ditu txaloak. Tantaka iritsi dira, ondorengoak, eta egunkaria irakurtzen izan da bateren bat kristalera handi eta argitsuaren ondoan. Beste hirurak ere gazteak, guztiak azken solairura, liburutegiak isilean ikasteko eskaintzen dien espaziora jo dute.
Udalak dagoeneko bi aste darama bisita gidatuak egiten herritarrekin, Lekuona Fabrika bertatik bertara erakutsi, eta izan ditzaketen zalantzak argitze aldera. Oraindik ere antolatzen jarraitzen du eta erantzunarekin pozik azaldu dira, herritar ugari ari delako bisita eskatzen.
Lehen erabiltzaileak ikastera bertaratu diren herritarrak izan dira, oro har.
Langile eta arduradunak pozik fabrikarekin, gogotsu eta ilusio handiz ekin diote bidearen lehen eguna izango denari. Kulturaren erdigunea izango den fabrikak lehen hitzorduak ere zehaztu ditu. Gaur bertan, Plaza Gorrian —Lekuonaren bigarren solairuan—Doraemonekin filosofatu, 6 eta 9 urte bitarteko haurrak hausnartzen jartzeko saioa egingo dute 17:30etik 18:45era; plazak agortuta daude. Bihar, berriz, Plaza Berdean—Lekuonaren lehenengo solairuan— Luis Barriosen Artista liburuaren matxinada… saiakeran oinarrituta solasaldia eta azalpen didaktikoa antolatu dute 18:00etatik 20:00etara. Gaztelaniaz izango da. Bihar ere, 18:30ean, Plaza Luzean oraingoan —0 solairuan— Guzman Villardonen Memorias olvidadas poesia liburua aurketuko dute.
Larunbata eta igandean Sorlekua auditorioak lehen ikuskizuna hartuko du, 19:00etan: Iratxe Ansa dantzari errenteriarrak Igor Bacovichekin batera gidatzen duen Metamorphosis Dance konpainiaren Al desnudo dantza ikuskizuna —Gonbidapenak agortuta daude—.
Datorren asteko egitaraua:
Maiatzak 31
- 16:00-18:00, Plaza Horia: Patchwork taldea. Patchwork-a gustuko dutenentzat sortutako taldea.
- 18:00-19:00, Plaza Berdea: Aura komikiaren proiekzioa. Haurrengan epilepsiari buruzko sentsibilizazioa sortzeko ekitaldia. Elkar Dibulgatuz proiektuan txertatuta dago eta Gipuzkoako Epilepsia Elkarteak antolatutakoa da. Algara Clowneko pailazoak izango dira bertan.
- 18:00-20:00, Plaza Horia: Patchwork taldea. Patchwork-a gustuko dutenentzat sortutako taldea.
Ekainak 1
- 16:00-18:00, Plaza Horia: Patchwork taldea. Patchwork-a gustuko dutenentzat sortutako taldea.
- 18:00-20:00, Plaza Horia: Patchwork taldea. Patchwork-a gustuko dutenentzat sortutako taldea.
- 18: 30-20: 00, Plaza Gorria: Gaztelaniazko literatur solasaldia. Komentatu beharreko obra Santiago Lorenzoren Los asquerosos da.
Ekainak 2
- 16:30-17:30, Plaza Horia: Euskarazko irakurketa errazeko taldea, Mintzalagun proiektua lagun duela.
- 17: 30-18: 45, Plaza Gorria: Harry Potterrekin filosofatu. 10 eta 13 urte bitarteko neska-mutilek Hodwarts magia eskolan gertatzen diren abenturen inguruan hausnartuko dute. (Plazak agortuta)
Ekainak 3
- 17:30-18:45, Plaza Gorria: Doraemonekin filosofatu. 6 eta 9 urte bitarteko haurrak hausnarketara gonbidatzen dituen jarduera. (Plazak agortuta)
Ekainak 4
- 18:00-19:00, Plaza Horia: Euskarazko irakurketa errazeko taldea, Mintzalagun proiektua lagun duela.
- 18:30, Plaza Luzea: Rosa Rubioren La casa del vampiro liburuaren aurkezpena.
Ekainak 5
- 20:00, Sorlekua: Olatz Salvadorren kontzertua. Aho Uhal bere bakarkako ibilbideko bigarren diskoaren aurkezpena. Sarreren salmenta maiatzaren 27tik aurrera Lekuona Fabrikan, bibe.me webgunean eta Niessen Kulturguneko leihatilan (Alfonso XI kalea) 18:00etatik 19:00etara.
