[Galeria] Ingurumen kontzientzia praktikara eraman dute Pasaiako gazteek
Eskubidean planaren barruko jarduera izan zen igandean Trintxerpen eta Antxon egin zutena. Herriko ikastetxe guztietako ikasleek parte hartu zuten.
Pasaiako gazteek Trintxerpeko eta Antxoko hainbat eremu garbitu zituzten joan den igandean. Ingurumen kontzientzia ariketa praktikoa izan zen egin zutena Anunciata, Karmengo Ama eta Pasaia-Lezo Lizeoa hezkuntza zentroetako ikasleek. Ikastetxe horietako nerabeen parte hartze guneetako kideak aritu ziren horretan, hainbat gurasoren laguntzarekin, eta Antxoko kasuan Kuadrillategiko gazteekin elkarlanean.
Igandekoa ez zen ausazko jarduera izan. Ikasturtean zehar, euren intereserako beste hainbat gairekin batera, ingurumen zaintzaren arloa landu dute. Hausnarketarako tartea hartu dute, informazioa bildu dute, eta proposamenak egin dituzte. Tartean, pasaitarrak ingurumenaren zaintzaz kontzientzia hartzeko kanpaina burutu dute, herriko hainbat txokotan eurek diseinatutako kartelak jarriz. Horiek guztiak egiteko Pasaiako Udala izan dute bidelagun, Eskubidean planaren bitartez.
Plan horrekin haurren eta nerabeen partaidetza bultzatzen da, adingabeak subjektu politiko bihurtuz. Hala, euren iritzi, proposamen eta ekarpenak udalerriaren garapenean txertatzea asmo du planak. Ingurumenaz gain, beste hainbat gai landu dituzte gazte eta nerabeek: herriko azpiegituren egoera, kirol ekipamenduen erabilera, gazteentzako aisialdi eskaintza, emakumeak kirolean, espazio publikoan nola sentitzen diren.
Ondoren daudenak igandeko hainbat argazki dira.
