Jarraitu dantzan
Lan handiari, eta arte eszenikoak, dantza zehazki, lau haizetara zabaldu eta ekarpen handia egiteagatik omendu du gaur Errenteriako Udalak Iratxe Ansa dantzari errenteriarra.
Iratxe Ansa dantzari errenteriarra, udal ordezkariekin. Merezitakoa. Lan handiari, eta arte eszenikoak, dantza zehazki, lau haizetara zabaldu eta ekarpen handia egiteagatik omendu du gaur Errenteriako Udalak Iratxe Ansa dantzari errenteriarra. Iaz, Espainiako Dantza Sari Nazionala irabazi zuen, eta aitzakia horrekin egin diote gaur omenaldia, etxekoak eta oso gertukoak lagunduta pleno aretoan. Hunkituta eta eskertuta azaldu da dantzaria, Udal Txistularien Bandak bidea zabaldu dionean eskailerak gora pleno aretoraino. Aizpea Otaegi alkateak lagunduta eta beste alderdietako ordezkariekin batera, zein senide eta gertukoekin egin du bidea.
Bihotzez esan die eskerrik asko Ansak gaur omendu dutenei, “omentzen ari zaretelako nire bizitza den nire karreragatik, egunero, uneoro, ikaragarri gozatzen dudana egietagatik”. Esker on hitzak, amari eta aitari, “hain gazte joaten uzteagatik, nire lekua zela argi nuen horren bila; ez nekien nola helduko nintzen, baina helduko nintzela banekien. Gaurkoa egun hunkigarria da, omentzen ari zaretelako niretzat dena suposatzen duen nire lana, dantzatzea”. Espainiako Dantza Sari NAzionalak, nolabait, bere sustraietara itzularazi duela aitortu du gaurko ekitaldian.
Gaur arratsean Igor Bacovichekin batera gidatzen duen Metamorphosis Dance proiektuaren barruko Al desnudo emanaldia emango dute berak eta Bacovichek Lekuonako Sorlekuan. Haiena izango da Lekuona Fabrikak hartuko duen lehen ikuskizuna, gaur eta bihar 19:00etan —sarrerak agortuta daude—, “espero dut emanaldian dena ematea biok, garena, eta ondo pasatzea guk eta publikoak”.
Publiko artean senideak, eta dantzaren munduko eragile hainbat. Jon Maya, Ereintza Dantza Taldeko arduradunak ere izan dira. Aizpea Otaegi alkateak, Ansaren ibilbide oparoa dantzan bildu du bere hitzartzean. Gaurko omenaldiaren bidez, saritik harago, dantzari errenteriarraren ibilbidea omendu nahi izan dutela azaldu du alkateak, “gure herriko beste dantzari aitortu batzuen modura, Ereintza Dantza taldean hasi zuen bidea, baina berehala hartu zuen kanporako bidea, hazteko eta hezteko aukera non, bera han”. Hortik aurrera, pasa dituen konpainien kontaketa egin du Otaegik eta 2009an bere ibilbide propioari ekin ziola nabarmendu du, “dantzari, irakasle eta koreografo gisa, eta duela bederatzi urte Igor Bacovichekin batera Metamorphosis Dance proiektua abiatu zuen”.
Gaur eta bihar Lekuona Fabrikako sorlekuan gozatzeko aukera izango den ikuskizuna, Veneziako Bienalerako hautatua izan dela ere aipatu du Otaegik: “Ziurrenik gauza asko esan gabe utzi ditut, txikitatik gauzak oso argi izan dituzula, argi berezia helarazten zenuela dantzatzean, zureengandik urrun bizitzeko ausardia izan duzula, edo nekaezin lan egin duzula. Udalbatzak, aitortu nahi dizu ausardia hori, argi hori, indar hori eta herri honen enbaxadore izatera eraman zaituen ibilbide handia”.
Xenpelarren omenezko eskulturaren erreplika eman diote Ansari, “utzi zizkigun bertsoei egiten die erreferentzia, baina berdin egin diezaieke bere ondotik sortu zareten artistei. Hari imaginario moduko bat sortu duzue diziplina eta belaunaldi ezberdinetako artistek. Zalantzarik gabe, herri honi hainbeste eman dion hari eta haloaren zati zara dagoeneko, eta ez izan alantzarik, zarenaren eta zarenari esker, beste batzuk izango direla”.
Ereintza dantza taldeko irakasleak, eta Jon Maya dantzariak ere hartu dute hitza —Kukai Dantzak ere jasoa du Espainiako Dantza Sari Nazionala—, eta dantza munduan bidaide izan dituenen bideoa ere osatu diote omenaldirako. Aurreskua ere dantzatu diote Anasa, Mairi Mayak eskaini dio dotore.
Balleterako zapatila bereziak ere jaso ditu dantzari handiak, Idoia Lizeaga sortzaileak arrosa hostoekin edertutakoak.
Udalaren omenaldia gaur jaso du, baina herritarren omenaldia, gaur eta bihar arratsaldean helduko zaio Ansari, Lekuona Fabrikan egingo duen emanaldietan.
