28 urteko gizon bat atxilotu dute Antxoko taberna batean lapurtzeagatik
Goizaldeko 04:30a aldera gizonezko bat atxilotu du Ertzaintzak, Pasai Antxoko ostalaritza establezimendu batean indarra erabiliz lapurreta egitea leporatuta.
Ertzaintzak 28 urteko gizonezko bat atxilotu du gaur goizaldean Antxon, indarra erabiliz lapurreta egitea leporatuta. Lokalaren inguruan agenteengandik ezkutatu nahian ari zela hauteman dute.
Gaur goizaldeko 04:30 aldera, Ertzaintzak Pasai Antxoko ostalaritza lokal batean egindako lapurreta baten berri izan du; adierazitako lekura hurbildu eta lokal ingurua miatzen ari zirela, gizon bat hauteman dute ibilgailu baten azpian ezkutatuta.
Gizonezko horri zegoen tokitik irteteko eskatu diote agenteek, eta berriemaileak emandako deskribapenarekin “erabat bat” zetorrela egiaztatu dute. Soinean zeramatzan gauzak aztertu dituztenean, agenteek txanpon mordoa aurkitu dizkiotela igarri dute, “eta ez du horien jatorriari buruzko azalpen zehatzik ematen jakin”.
Lokala aztertu dutenean, agenteek ikusi dute diru-kutxa zabalik zegoela eta lokaleko barra gainean zegoen oinetako arrastoa bat zetorrela hautemandako gizonak zeramatzan oinetakoekin. Hori ikusita, ertzainek atxilotu egin dute gizonezkoa, indarrez lapurreta egitea leporatuta.
Atxilotuari egindako prebentziozko miaketan aurkitu dizkioten ebidentzia batzuk bart gauean bertan auto batean egindako lapurretarekin lotuta egon litezkeela adierazi du Ertzaintzak. Gizonezkoak polizia aurrekariak ditu jabetzaren aurkako delituengatik, eta Ertzaintzaren egoitzara eraman dute dagozkion polizia-eginbideak hasteko. Horiek amaituta, aske utzi dute, deitzen diotenean epailearen aurrera agertu beharko duela jakitera emanda.
