Udalerriko saltokien itxierarekiko kezka azaldu du Pasaiako Sortuk
2008tik hona Pasaiako denden %25k itxi du. 'Non daude gure komertzioak?' lelopean, kanpaina bat abiarazi dute egoeraren larritasunaz kontzientzia pizteko.
Sortuk nabarmendu du komertzioek herria bizirik mantentzen duten heinean, lokal hutsek iluntasuna eta zikinkeria dakartela. 
Aspaldian nahiz berriki pertsiana betirako jaitsi duten hainbat saltokietan hausnarketarako oroigarriak jarri ditu Pasaiako Sortuk “Gogoratzen duzu zer zegoen hemen?” esaldiarekin.
Taldeak salatu du 2008tik hona udalerriko denden %25ak itxi egin duela, eta %80 baino gehiago direla Pasaiatik kanpo lan egiten duten herritarrak. Azken datu hori, inguruko udalerriekin alderatuta, “benetan altua” dela nabarmendu dute, izan ere, Oarsoaldean %50ekoa baita portzentai hura.
Egoeraren larritasunak kezkatuta, kanpaina bat jarri dute martxan “herri bizi hori berreskuratzeko”, eta hartarako politika “integral eta errealak” galdegin dituzte; besteak beste, komertzioentzako laguntzak edota gazteek herrian lan egin ahal izateko planak.
