'Zuhaitz bat Europagatik', Lezon
Jesus Mari Martiarena alkateak eta Joxean Sanchez Ingurumen eta Trantsizio Ekologikoko zinegotziak zuhaitz bat landatu dute, Markesanen.
Zuhaitz bat Europagatik iniziatibarekin bat egin du Lezoko Udalak. Zuhaitz bat landatu dute horretarako Markesanen Jesus Mari Martiarena alkateak eta Joxean Sanchez Ingurumen eta Trantsizio Ekologikoko zinegotziak, Ginkgo biloba motakoa. David Sassoli Europako Parlamentuko presidenteak eta Ekipo Europa elkarteak sustatutako kanpaina da Zuhaitz bat Europagatik. Ingurumenaren Nazioarteko Egunaren harira (ekainaren 5ean da) abian da kanpaina hori, eta herri nahiz hirietan garapen iraunkorraren gaineko kontzientzia sortzea du xede, gazteen artean batik bat.
Alkateak esan duenez, keinu guztiek balio dute planeta zaintzeko: “Gaurko landaketarekin beste urrats bat egin dugu Lezo udalerri iraunkor eta berdeagoa bihurtzeko konpromisoan”. Sanchezek, berriz, zuhaitzek ingurumenean duten garrantzia nabarmendu du, “klima aldaketaren aurkako borrokan betetzen duten funtsezko funtzioa agerian utzi nahi dugu”.
Herrira begira, udal ordezkariek zehaztu dute Jaizkibelgo biodibertsitatea eta bertako basoa berreskuratzeko lanak egiten ari dela udala. Aldi berean, ikastetxeekin Agenda 2030eko edukiak lantzen ari dira, basoena tartean dela.
