[Galeria eta bideoa] Ezkurdia, Lobete, eta familia handi bat
Julen Lobete eta Imanol Ezkurdia Real Sociedad B taldeko kirolariei omenaldia egin zien atzo Allerruk. Emozioa, beste era batekoa, Plazetan.
Allerru familia handi bat da. Herri txiki bateko sendi izugarri handia. Eta familia zabal horrek Imanol Ezkurdia eta Julen Lobete omendu zituen atzo Plazetako futbol zelaian. Familiek dituzten ezaugarri guztiekin: goxotasuna, hurbiltasuna, konfiantza eta maitasuna. Bi futbol jokalariek Real Sociedad B taldearekin Bigarren Mailara igotzeko eskubidea irabazi dute. Realak emandako datuen arabera, 2021-2022 sasoian han jarraituko dute biek.
Plazeta haurrez bete zen atzo arratsaldean, Allerruren futbol eskolako partaideekin. Lobete eta Ezkurdia iristerako jada sarreratik zelai erdirainoko pasabidea egina zuten denek, zintzo arraio. Omenaldi zeremonia, bi kirolariek haurrek osatutako pasilloa zeharkatzen hasi zen. Behin Plazetaren erdira iritsira, elastiko zuri-berdea jantzita, hiru neskek Agurra dantzatu zieten. Jokalariak geldi, hunkituta. Ondoren iritsi zen garaikurren trukearen aroa.
Allerruren emakumeen eta gizonen lehen taldeetako kapitainek, Irati Mateok eta Xabi Prietok, herriko taldearen elastiko bana eman zieten jokalariei. Ondoren, Jesus Mari Martiarena alkateak txapela jantzi zien. Eta hizketaldiak pasata, Lobetek zein Ezkurdiak igoerako kanporaketetan ondo izerditutako elastikoak eman zizkieten Allerruko arduradunei. Herriko taldeari aitortza izan zen hori jokalarien partetik.
Allerruren partetik hitz egin zuenak, lehenik eta behin zorionak eman zizkien lezoarrei. Eta oroitu zituen Plazetara astean zehar, eta partidetan, jokalari gazteenak laguntzera etortzen direnak (gurasoak, aiton-amonak, izeba-osabak), haiek ere egiten baitute kluba. Horregatik da familia handi bat Allerru.
Futbolariek ere hitz egin zuten. Ezkurdiak esan zuen lanarekin pixkanaka ametsak lortzeko aukera dagoela, eta laster Realaren lehen taldean egoteko esperantza duela. “Aupa Allerru eta aupa denak!”, oihukatu zuen Ezkurdiak bere hitzartea bukatzeko. Lobetek, berriz, eskerrak eman zituen omenaldiagatik, “ez genuen espero horrelako zer edo zer. Omenaldi txiki bat espero genuen. Oso polita izan da dena, eskertzekoa”. Lobetek Allerrun egin zituen bi urteak oroitarazi zituen, “nagoen tokira iristeko oso baliagarriak izan ziren. Oso pozik hemen egindako bideagatik. Aupa Allerru!”.
Talde argazkia ateratzen bukatu zuten atzoko ekitaldia. Familia argazkia. Lobete, Ezkurdia, eta familia handi bat.