Azken asteburuetako gertakarien gogoeta egiteko, herritarren bilera asteazkenean
Asteburuetako gertakarien gaineko kezka partekatzeko eta "herri hobeago bat egiteko" deitu dute batzarrera. Asteazkeneko 19:00etan da, Saldisen.
Lezoko herritar talde batek beregain hartu du azken asteburuetan herrian izan diren arazoen gaineko gogoeta egitea, “izandako gertakari batzuen aurrean kezka dugun herriko bizilagun talde bat gara”. Eta talde horrek lezoar ororekin partekatu nahi du hausnarketa. Horretarako batzarrera deitu dituzte herritarrak asteazkenerako (hilaren 9rako), 19:00etan, Saldise plazan.
Lezoar taldeak zabaldu duen oharraren arabera, zarata, zikintasuna, liskarrak, eta txikizioa izan dira herrigunean goizaldeko orduetan, batez ere joan den asteburuan, “azkeneko asteburuan marra gorri batzuk gainditu dira”. Jarrera horiek Lezon arazoak sortu dituztela adierazi dute, “inguruko bizilagunoi loa kendu digute, elkarbizitza arazoak sortu dira, eta goizetan umeek ere ikuskizun tamalgarria izan dute begien aurrean”.
Taldekideek nabarmendu dute herritar guztiek dutela biltzeko eskubidea, eta ongi pasatzeko nahia eta beharra ulertzen dituztela, “baina dena ez da libre. Ez dugu halako Lezo bat merezi; ez dugu halako Lezo bat nahi eta behar, denontzako herri bat baizik”. Beraz, noranzko guztietako errespetua eta elkartasuna eskatu dituzte, eta konponbiderako tresnatzat bide poliziala errefusatu egin dute. “Zain gaitezen elkar, herri hobeago bat egiteko”.
